कागल : बहुजन समाज उद्धारक, लोकराजा छत्रपती राजर्षी शाहू महाराज यांची १४८ वी जयंती कागलच्या शाहू साखर कारखान्याच्या कार्यस्थळावर मोठ्या उत्साहात साजरी केली. शाहू ग्रुपचे अध्यक्ष समरजितसिंह घाटगे यांच्या हस्ते त्यांच्या पुतळ्याचे पूजन संपन्न झाले.
कागल संस्थानचे भूतपूर्व अधिपती श्रीमंत जयसिंगराव घाटगे यांच्या प्रधान कार्यालयातील प्रतिमेचे व कारखान्याचे संस्थापक स्व. विक्रमसिंहराजे घाटगे यांच्या पुतळ्यासही त्यांनी पुष्पहार अर्पण करून अभिवादन केले.
यावेळी कारखान्याचे संचालक सतीश पाटील व संजय नरके यांनी शाहू महाराजांच्या पूर्णाकृती पुतळ्यास पुष्पहार अर्पण केला. कारखान्याचे, व्हाईस चेअरमन अमरसिंह घोरपडे, सर्व संचालक, कार्यकारी संचालक जितेंद्र चव्हाण, आदींसह शाहू ग्रूपमधील विविध संस्थाचे पदाधिकारी, कागल नगरपरिषदेचे नगरसेवक अधिकारी, कर्मचारी उपस्थित होते. यावेळी फटाक्यांची आतषबाजी व शाहू महाराज की जय अशा घोषणांनी परीसर दुमदुमुन गेला.
