कोल्हापूर : कोल्हापूर जिल्ह्यातील आघाडीची सहकारी संस्था असलेल्या गोकुळ दूध संघाच्या पंचवार्षिक निवडणूक प्रक्रियेला विलंब होण्याची शक्यता आहे. निवडणूक प्रक्रिया 8 ऑगस्टपर्यंत पूर्ण करणे शक्य नसल्याचे सांगत निवडणूक प्राधिकरणाने मुदतवाढीसाठी सर्वोच्च न्यायालयात धाव घेतली आहे.
मिळालेल्या माहितीनुसार, गोकुळच्या संचालक मंडळाचा कार्यकाळ नुकताच संपला आहे. त्यामुळे नव्या निवडणुकीची प्रक्रिया सुरू करण्यात आली होती. मात्र पात्र आणि अपात्र संस्थांच्या याद्या तयार करणे, हरकती व तक्रारींचे निवारण यामुळे ही प्रक्रिया पूर्ण होण्यास वेळ लागणार आहे.
त्यामुळे निवडणूक प्राधिकरणाने राज्याच्या सहकार विभागाकडे मुदतवाढ मागितली होती. परंतु त्यावर कोणताही निर्णय न झाल्याने अखेर प्राधिकरणाने थेट सर्वोच्च न्यायालयात याचिका दाखल केली आहे.
या याचिकेत निवडणूक प्रक्रिया पूर्ण करण्यासाठी अधिक वेळ द्यावा अशी मागणी करण्यात आली आहे. जोपर्यंत न्यायालयाचा निर्णय येत नाही तोपर्यंत पुढील प्रक्रिया थांबवण्यात आली आहे.
दरम्यान, या घडामोडींमुळे गोकुळच्या हजारो सभासदांमध्ये उत्सुकता आहे. नियोजित वेळेत निवडणूक होणार की नाही याकडे आता सर्वांचे लक्ष लागले आहे.
