पुणे : पुण्यातील दीनानाथ मंगेशकर रुग्णालयात गर्भवती महिलेला वेळेवर उपचार न मिळाल्याने तिचा मृत्यू झाल्याच्या गंभीर आरोपानंतर, आता राज्य सरकारने या प्रकरणाची तातडीने दखल घेतली आहे. राज्याचे आरोग्यमंत्री प्रकाश आबिटकर आणि पुण्याचे जिल्हाधिकारी जितेंद्र डुडी या दोघांनीही चौकशीचे आदेश दिले असून, रुग्णालय प्रशासन दोषी आढळल्यास कठोर कारवाई करण्याचा इशारा दिला आहे.
आरोग्यमंत्री प्रकाश आबिटकर यांनी या घटनेवर तीव्र दुःख व्यक्त केले आहे. “अधिकचे पैसे न भरल्यामुळे पुण्यातील मंगेशकर रुग्णालयात एका महिलेला उपचार नाकारण्यात आले. यामुळे सदर महिलेचा जीव गेला आहे. ही अस्वस्थ करणारी आणि मन सुन्न करणारी घटना आहे,” असे ते म्हणाले. त्यांनी तात्काळ एक चौकशी समिती )स्थापन करण्याचे आदेश दिले आहेत. ही समिती या प्रकरणाची सखोल चौकशी करेल आणि यामध्ये पीडित महिलेच्या नातेवाईकांचे म्हणणे देखील ऐकून घेतले जाईल, असे त्यांनी स्पष्ट केले.
चौकशी समितीचा जो अहवाल येईल त्या अहवालाच्या आधारे सदर रुग्णालयावर कायदेशीर कारवाई केली जाईल,” असा स्पष्ट इशारा आरोग्यमंत्र्यांनी दिला आहे. त्यांनी पुढे नमूद केले की, “मंगेशकर रुग्णालयाची नोंदणी ट्रस्ट ॲक्टखाली आहे. शासनाच्या विविध योजनांचा आणि सुविधांचा लाभ या रुग्णालयाला दिला जातो. असं असताना या रुग्णालयाकडून रुग्णाला दाखल करून घेण्याआधीच पैशाची मागणी करण्यात आली असेल आणि काही चुकीचा प्रकार घडला असला तर मंगेशकर रुग्णालयावर शासनाच्या वतीने कठोर कारवाई आपण करणार आहोत.”
पुण्याचे जिल्हाधिकारी जितेंद्र डुडी यांनीही या घटनेची गंभीर दखल घेतली आहे. “या घटनेची आम्ही नोंद घेतली आहे. संबंधितांवर उचित कारवाई करणार आहोत,” असे त्यांनी म्हटले आहे. त्यांनी नेमलेल्या चौकशी समितीला दोन दिवसांत अहवाल सादर करण्यास सांगितले आहे, जेणेकरून नेमके काय घडले हे स्पष्ट होईल. “याप्रकरणी कडक कारवाई करणं आवश्यक आहे,” असेही त्यांनी नमूद केले.
विशेष म्हणजे, काही काळापूर्वी राज्य मंत्रिमंडळाने दीनानाथ मंगेशकर रुग्णालयाला नाममात्र दराने सरकारी जमीन भाडेतत्त्वावर देण्याचा निर्णय घेतला होता, जो तनिषा भिसे प्रकरणानंतर वादात सापडला आहे. याबाबत विचारले असता, जिल्हाधिकाऱ्यांनी सांगितले की, “भाडेतत्वावर कोणालाही जमीन देताना काही अटी असतात त्या अटी-शर्थी बघून निर्णय घेऊ.” त्यांच्या या वक्तव्यामुळे सरकार जमीन भाडेतत्त्वावर देण्याच्या निर्णयाचा फेरविचार करणार का, अशी शक्यता निर्माण झाली आहे. दरम्यान, तनिषा भिसे (वय २७) या सात महिन्यांच्या गर्भवती महिलेचा २९ मार्च रोजी उपचाराअभावी मृत्यू झाला होता. त्यांचे पती सुशांत भिसे हे विधान परिषदेचे आमदार अमित गोरखे यांचे स्वीय सहाय्यक आहेत.
