नवी दिल्ली : कोल्हापूरच्या खासबाग कुस्ती मैदानाच्या विकासाकरिता केंद्रातून निधी उपलब्ध व्हावा, यासाठी खासदार संभाजीराजे छत्रपती यांनी केंद्रीय क्रीडामंत्री अनुराग ठाकूर यांची दिल्ली येथे भेट घेतली.
येत्या ६ मे रोजी राजर्षी शाहू छत्रपती महाराजांची स्मृतीशताब्दी आहे. या निमित्ताने महाराजांनी कुस्ती हा खेळ वृद्धींगत करण्यासाठी उभ्या केलेल्या खासबाग कुस्ती मैदानाचे पुनरूज्जीवन करणे गरजेचे आहे. याबाबत आज क्रीडामंत्री अनुराग ठाकूर यांना सविस्तर माहिती दिली आणि निधी मागणीचे पत्र दिल्याचे संभाजीराजे यांनी सांगितले.
मंत्री अनुराग ठाकूर यांनी या मागणीला सकारात्मक प्रतिसाद दिला असून या मैदानाच्या विकासासाठी राज्य शासनाकडून सविस्तर आराखडा मागवून घेऊ व त्यानुसार आवश्यक तितक्या निधीची तरतूद करू, अशी ग्वाही दिली आहे.
याबाबत संभाजीराजे यांनी सांगितले की, याआधी मी कोल्हापुरातील हॉकी स्टेडियमसाठी केंद्रातून साडेपाच कोटी रूपये निधी आणलेला आहे. या निधीतून हॉकी स्टेडियम येथे आंतरराष्ट्रीय दर्जाचे विकासकाम सुरू आहे. राज्य शासनाने खासबाग मैदानाबाबतही आवश्यक प्रस्ताव तातडीने दिल्यास, ‘छत्रपती शाहू महाराज कृतज्ञता पर्वा’निमित्त दोन्ही मैदानांच्या विकासकामांचे उद्घाटन एकत्रित करता येईल, असे मंत्री महोदयांनी सूचित केले आहे. त्यामुळे राज्य शासनाने तातडीने कार्यवाही करीत खासबाग मैदानाचा विकास आराखडा व प्रस्ताव केंद्रीय क्रीडा मंत्रालयाकडे सादर करावा, अशी सूचना संभाजीराजे यांनी केली आहे.
