सिंधुदुर्ग : शिक्षण प्रसारक मंडळ आणि भाईसाहेब सावंत प्रतिष्ठान, सावंतवाडी यांच्या विद्यमाने जेष्ठ काँग्रेस नेते आणि महाराष्ट्राचे माजी आरोग्यराज्यमंत्री स्वर्गीय भालचंद्र अनंत तथा भाईसाहेब सावंत यांच्या 101 व्या जयंतीनिमित्त अर्धाकृती पुतळा अनावरण आणि स्मरणिका प्रकाशन सोहळा भाईसाहेबांच्या भगिनी कुसुमताई बिलिये यांच्या हस्ते माजी केंद्रीय मंत्री रमाकांत खलप, माजी शिक्षणमंत्री दिपक केसरकर आणि आमदार सतेज पाटील उपस्थीतीत प्रेरणा समाधीस्थळ, सावंतवाडी येथे पार पडला.
पद्मश्री डी. वाय. पाटील साहेबांच्या बरोबर आपले असलेले स्नेहपुर्ण संबंध स्व. भाईसाहेब सावंत यांनी शेवट पर्यंत जपले. भाईसाहेबांनी प्रज्वलित केलेली सन्मान, सहकार्य आणि समाजसेवेच्या विचारांची मशाल आपण सर्वांनी तेवत ठेवली पाहिजे अशी भावना आमदार सतेज पाटील यांनी यावेळी व्यक्त केली.
यावेळी माजी आमदार बाळाराम पाटील, प्रविण भोसले, वैभव नाईक, राजन तेली यांच्यासह सिंधुदुर्ग जिल्हा परिषदेचे माजी अध्यक्ष सतिश सावंत, रेष्मा सावंत, संजय पडते, सिंधुदुर्ग जिल्हा काँग्रेसचे माजी अध्यक्ष विकास सावंत, सिंधुदुर्ग जिल्हा बॅंकेचे अध्यक्ष मनिष दळवी, संचालक विद्याप्रसाद बांदेकर, जिल्हा काँग्रेसचे विद्यमान अध्यक्ष इर्शाद शेख, प्रदेश प्रतिनिधी प्रकाश जैताप, गोकुळचे संचालक बयाजी शेळके, पद्मश्री डी. वाय. पाटील साखर कारखान्याचे संचालक गुलाबराव पाटील, मानसिंगराव पाटील यांच्यासह शैक्षणिक, सामाजिक आणि राजकिय क्षेत्रातील अनेक मान्यवर तसेच मोठ्या संख्येने नागरिक उपस्थित होते.
