कागल : आजचे युग हे स्पर्धेचे असून स्पर्धेत टिकणारे सक्षम विद्यार्थी घडवू, असे प्रतिपादन राजमाता जिजाऊ महिला समितीच्या कार्याध्यक्षा सौ. नवोदिता घाटगे यांनी केले.
दि कागल सिनियर एज्युकेशन चॅरिटेबल ट्रस्ट, मुरगूड व श्री छत्रपती शाहू शिक्षण प्रसारक मंडळ , संचलित राजे विक्रमसिंह घाटगे ॲकॅडमी यांच्यावतीने येथील श्रीमंत जयसिंगराव घाटगे शिक्षण संकुल येथे गुणवंत विद्यार्थ्यांच्या सत्कार प्रसंगी त्या बोलत होत्या.
अध्यक्षस्थानी शाहू साखर कारखान्याच्या अध्यक्षा श्रीमती सुहासिनीदेवी घाटगे होत्या.
इयत्ता दहावीमध्ये कागल तालुक्यात प्रथम येणाऱ्या विद्यार्थ्यासाठीच्या स्व. राजे विक्रमसिंह घाटगे पुरस्काराने बिद्री येथील भारतमाता हायस्कूलचा सोहम देसाई व मुगळी हायस्कूलची साक्षी कुणकेकर हे संयुक्त मानकरी ठरले. तर बारावीतील कारखाना शिक्षण संकुलमधील प्रथम क्रमांक पटकावल्याबद्दल आशिष खोत यांना कर्नल दिलीपसिंह मंडलिक पुरस्कार देऊन गौरवले. यावेळी अन्य गुणवंत विद्यार्थ्यांचाही सत्कार केला.
सौ. घाटगे पुढे म्हणाल्या, स्पर्धेच्या युगात ग्रामीण भागातील विद्यार्थी अद्यावत माहिती व शैक्षणिक सुविधांअभावी यासाठी आम्ही त्यांची बौद्धिक शारीरिक शैक्षणिक व मानसिक तयारी करून घेण्यासाठी नियोजनबद्ध कार्यक्रम आखला आहे स्पर्धेच्या युगात हे विद्यार्थी सक्षम व्हावेत हाच आमचा ध्यास आहे. यासाठी राजे विक्रमसिंह घाटगे ॲकॅडमीचा लाभ सर्वांनी घ्यावा.
अध्यक्षीय भाषणात श्रीमंत सुहासिनीदेवी घाटगे म्हणाल्या, शिक्षण ही निरंतर चालणारी प्रक्रिया आहे. विद्यार्थ्या सोबतच पालकांनीही दक्ष असायला हवे. आपले ध्येय निश्चित करून, योग्य मार्गाने प्रयत्न करायला हवा. आपण निवडलेल्या क्षेत्रात आपल्या आई-वडिलांचा, शाळेचा व देशाचा नावलौकिक होईल असे कार्य विद्यार्थ्यांनी करावे.
यावेळी टी. एन. सी. एज्युकेशन सोसायटीचे अध्यक्ष प्रा. टी. एन. चव्हाण यांनी राजे विक्रमसिंह घाटगे ॲकॅडमीबद्दल माहिती दिली. तसेच कर्नल दिलीपसिंह मंडलिक यांनीही मनोगत व्यक्त केले.
यावेळी शाहू साखर कारखान्याचे उपाध्यक्ष अमरसिंह घोरपडे, कार्यकारी संचालक जितेंद्र चव्हाण, शिक्षण प्रसारक मंडळाचे सेक्रेटरी टी. जी. आवटे, शिक्षण प्रसारक मंडळाचे सदस्य युवराज पसारे, प्रशासन अधिकारी कर्नल एम. व्ही. वेस्वीकर, मुख्याध्यापिका श्रीमती जे. व्ही. चव्हाण आदी उपस्थित होते.
प्रास्ताविक मुख्याध्यापक एस.डी. खोत यांनी केले. सूत्रसंचालन सौ. एस.एस पोवार यांनी केले. आभार सौ.प्रगती घाटगे यांनी मानले.
