कुंभोज (विनोद शिंगे)
रुई (ता. हातकणंगले) येथे पंचगंगा नदीपात्रात मासेमारीसाठी मच्छीमारावर मगरीने अचानक हल्ला केला. यात बिरदेव पांडुरंग बागडी (वय ४८, रुकडी) गंभीर जखमी झाले. इतर मच्छीमारांनी दाखवलेल्या धाडसामुळे त्यांचा जीव वाचला. ही घटना नुकतीच घडली आहे.
याबाबत अधिक माहिती अशी : बागडी नेहमीप्रमाणे रुई येथील नदीपात्रात उतरून मासेमारी करत होते. पाण्यातील गाळात मगरीने त्यांच्यापायाला पकडले. यावेळी मगरीकडून त्यांना आत ओढून नेण्याचा प्रयत्न झाला. प्रसंगावधान राखून सुजित बागडी आणि इतर सहकाऱ्यांनी तत्काळ मदत करत त्यांची सुटका केली. मात्र, या झटापटीत बागडी यांच्या डाव्या पायाला गंभीर जखमा झाल्या आहेत. स्थानिकांनी त्यांना इचलकरंजीतील आयजीएममध्ये दाखल केले. त्यांच्या डाव्या पायाला तेरा टाके पडले आहेत.
दरम्यान, येथल पंचगंगा नदीपात्रामध्ये मागील काही दिवसांपासून मगरीचा वावर वारंवार निदर्शनास येत असून, परिसरातील नागरिकांमध्ये भीतीचे वातावरण आहे. प्रशासनाने याबाबत तातडीने उपाययोजना कराव्यात, अशी मागणी नागरिकांतून होत आहे.विनोद शिंगे कुंभोज
