गांधीनगर:- गांधीनगर (ता. करवीर) येथे६ वर्षाच्या अल्पवयीन मुलीवर १३ वर्षाच्या अल्पवयीन मुलाकडून चॉकलेटचे आमिष दाखवून लैंगिक अत्याचाराचा प्रयत्न केल्याचा प्रकार घडला. या घटनेनंतर संशयित मुलाला जमावाने पोलीसांच्या ताब्यात दिले. संशयित मुलावर बाल लैंगिक अत्याचार अंतर्गत पुन्हा दाखल झाला आहे. ही बातमी गांधीनगरात पसरताच पोलीस ठाण्यासमोर नागरिकांचा मोठा जमाव जमला.
याबाबतची माहिती अशी की, शुक्रवारी दुपारी तीनच्या सुमारास घराशेजारी खेळत असलेल्या अल्पवयीन मुलीला अल्पवयीन मुलाने चॉकलेटचे आमिष दाखवून जवळच असलेल्या घराच्या गच्चीवर नेले. त्याठिकाणी तो मुलगा तिच्यावर लैंगिक अत्याचाराचा प्रयत्न करत होता. यावेळी त्या मुलीची आई मुलीला शोधू लागली. घराजवळील सीसीटीव्हीचे फुटेज तपासले असता. मुलीला तो मुलगा जिन्यावरुन नेत असल्याचे दिसले. लगेचच मुलीची आई आणि शेजारी गच्चीवर गेले असता त्याठिकाणी मुलगी आणि मुलगा दिसून आले. मुलगा नग्न अवस्थेत होता.
यावेळी मुलीच्या आईने आरडाओरडा केल्यावर परिसरातील नागरिक जमले. त्यांनी मुलाला मारहाण करत पोलीस स्टेशनला आणले. तोपर्यंत ही बातमी गांधीनगरात वार्यासारखी पसरली, ही बातमी समजताच व्यापार्यांनी आपली बाजारपेठेतील दुकाने बंद करुन पोलीस स्टेशनकडे धाव घेतली. बघता बघता पोलीस स्टेशनसमोर शेकडो लोकांचा जमाव जमला. सहाय्यक पोलीस निरीक्षक अर्जुन घोडेपाटील यांनी जमावाला समजावून सांगण्याचा प्रयत्न केला. परंतु संशयित आरोपींवर गुन्हा दाखल होत नाही तोपर्यंत आणि लोकप्रतिनिधी, वरिष्ठ पोलीस अधिकारी येत नाहीत तोपर्यंत हलणार नाही अशी भूमिका जमावाने घेतली. जमावाला नियंत्रणात आणण्यासाठी पोलीसांनी सौम्य लाठीमार केला.
दरम्यान अप्पर पोलीस अधीक्षक निकेश खाटमोडे पाटील, पोलीस उपअधीक्षक संकेत गोसावी यांनी पोलीस स्टेशनला भेट दिली. परिस्थितीचे गांभिर्य ओळखून पोलीसांचे जलद कृती दल पाचारण केले. यानंतर शिरोली एमआयडीसी पोलीस ठाण्याचे सपोनि पंकज गिरी, गोकुळ शिरगाव पोलीस ठाण्याचे सपोनि दिगंबर गायकवाड, कागल पोलीस स्टेशनच्या सहाय्यक पोलीस निरीक्षक करपे, स्थानिक गुन्हे अन्वेषणचे पोलीस निरीक्षक रविंद्र कळंमकर आदिंसह फौजफाटा दाखल झाला. दरम्यान दक्षिणचे आमदार ऋतुराज पाटील, भाजपाच्या महिला प्रदेश उपाध्यक्षा शौमिका महाडिक यांनी पिडित मुलीच्या पालकांना भेटून धीर दिला. यानंतर सिंधी सेंट्रल पंचायत मध्ये झालेल्या शांतता बैठकीत आमदार ऋतुराज पाटील, शौमिका महाडिक, जमावाला शांततेचे आवाहन करुन दोषींवर कडक कारवाईच्या पोलिसांना सूचना दिल्या.
याबाबत अधिक तपास सहाय्यक पोलीस निरीक्षक अर्जुन घोडेपाटील करत आहेत.
