कोल्हापूरमधील सराईत गुन्हेगाराला मध्य प्रदेशातून उचलले

पुणे (प्रतिनिधी) : कोल्हापूरमधील सराईत गुन्हेगार प्रकाश बांदिवडेकरला पुणे पोलिसांनी मध्य प्रदेशातून ताब्यात घेतले आहे. पुण्यातील अट्टल गुंड गज्या मारणेच्या खंडणी प्रकरणात इंदूरमध्ये त्याला ताब्यात घेण्यात आले.

कोल्हापूर जिल्ह्यात गाजलेल्या ‘खूनाच्या बदल्यात खून’ प्रकरणातील प्रकाश बांदिवडेकर सराईत गुन्हेगार आहे. त्याच्याविरुद्ध खून, खंडणी असे अनेक गुन्हे दाखल आहेत.

गुंड गज्या मारणेच्या टोळीने ८ ऑक्टोबर २०२२ रोजी एका व्यावसायिकाचे अपहरण करीत २० कोटी रुपयांची खंडणी मागितली होती. या प्रकरणात रुपेश मारणे, सचिन घोलप, अमर किर्दत, हेमंत पाटील, फिरोज शेख व अन्य साथीदारांवर अपहरण, मारहाण, खंडणी, जिवे मारण्याची धमकी केल्याप्रकरणी गुन्हा दाखल झाला होता. पोलिसांनी चार जणांना अटक केली होती, त्यानंतर गज्या मारणे व त्याच्या १३ साथीदारांवर “मोका” नुसार कारवाई करण्यात आली होती. खंडणी प्रकरणानंतर गुंड गज्या मारणे पसार झाला आहे. त्याला पकडण्यासाठी गुन्हे शाखेकडून शोध सुरु आहे. 

या प्रकरणात आणखी सहभागींचा शोध घेत असताना प्रकाश बांदिवडेकरचा सहभाग असल्याचे उघड झाल्यानंतर खंडणी विरोधी पथकाने त्यास इंदूर येथून ताब्यात घेतले. मारणेला आश्रय देणाऱ्यांना मोका कारवाई करण्याचा इशारा पोलिस आयुक्त अमिताभ गुप्ता यांनी दिला आहे.

दरम्यान, कोल्हापूर जिल्ह्यामधील चंदगड तालुक्यातील नागनवाडी येथील बांदिवडेकर कुटुंबामध्ये अनेक वर्षांपासून शेती आणि प्रतिष्ठेवरून वाद सुरु होता. त्यातून एकापाठोपाठ एक नऊ जणांना जीव गमवावा लागला होता. या कुटुंबामध्ये डॉक्टर, इंजिनिअर, वकील, असे अनेक नामवंत सुशिक्षित होते.

🤙 9921334545