मुंबई : राष्ट्रवादी कॉंग्रेसचे अध्यक्ष शरद पवार यांच्या मुंबईतील सिल्व्हर ओक या निवासस्थानी झालेल्या हल्ल्याप्रकरणी न्यायालयीन कोठडीत असलेल्या ११५ एसटी कर्मचार्‍यांनी जामीनासाठी अर्ज केला आहे. उद्या बुधवारी मुंबई सत्र न्यायालयात या जामिनावर सुनावणी होणार आहे.
एसटी कर्मचारी ८ एप्रिल रोजी अचानकपणे शरद पवार यांच्या निवास्थानाच्या आवारात शिरले. यावेळी संतप्त कर्मचाऱ्यांनी जोरदार घोषणाबाजी करत दगडफेक आणि चप्पलफेक केली होती. शिवाय, शरद पवार, उपमुख्यमंत्री अजित पवार यांच्यासह महाविकास आघाडी सरकारविरोधात जोरदार घोषणाबाजी केली होती. सिल्व्हर ओकवरील आंदोलनानंतर एसटी कर्मचार्‍यांचे वकिल गुणरत्न सदावर्ते यांना अटक करण्यात आली होती. तसेच ११५ एसटी कर्मचाऱ्यांनादेखील अटक करण्यात आली होती. या ११५ आरोपींमध्ये २४ महिलांचा समावेश आहे. न्यायालयीन कोठडीत असलेल्या एसटी कर्मचाऱ्यांनी जामीनासाठी अर्ज केला आहे. बुधवार २० एप्रिलला मुंबई सत्र न्यायालयात या जामीन अर्जावर सुनावणी होणार आहे.
