कोल्हापूर:सामाजिक न्याय, समता, शिक्षणाचा प्रसार आणि बहुजन कल्याणाचा विचार समाजात रुजविणारे, लोककल्याणकारी राजे राजर्षी छत्रपती शाहू महाराज** यांच्या जयंतीनिमित्त आज दि. 26 जून 2026 रोजी जिल्हा परिषद, कोल्हापूर येथे राजर्षी शाहू महाराज यांच्या प्रतिमेस पुष्पहार अर्पण करून अभिवादन करण्यात आले. हा कार्यक्रम अत्यंत उत्साहपूर्ण वातावरणात संपन्न झाला.
यावेळी मुख्य कार्यकारी अधिकारी डॉ. जॅसमिन यांच्या हस्ते राजर्षी शाहू महाराज यांच्या पुतळ्यास पुष्पहार अर्पण करण्यात आला. उपस्थित सर्व अधिकारी व कर्मचाऱ्यांनी पुष्पांजली अर्पण करून राजर्षी शाहू महाराज यांच्या कार्यास विनम्र अभिवादन केले.
या कार्यक्रमास उप मुख्य कार्यकारी अधिकारी (सा.प्र.) श्री. ओमप्रकाश यादव, जिल्हा आरोग्य अधिकारी डॉ. अनिरुद्ध पिंपळे, जिल्हा समाज कल्याण अधिकारी श्री राजेंद्र माने , कार्यकारी अभियंता (पाणी पुरवठा) श्री. अर्जुन गोळे, सहाय्यक गटविकास अधिकारी श्री. मेश्राम तसेच जिल्हा परिषदेच्या विविध विभागांतील अधिकारी, कर्मचारी मोठ्या संख्येने उपस्थित होते.
याप्रसंगी “नशामुक्त भारत अभियान”अंतर्गत उपस्थित सर्व अधिकारी व कर्मचाऱ्यांनी व्यसनमुक्त समाज निर्माण करण्याचा संकल्प करत “नशामुक्त भारत” ही शपथ घेतली. समाजामध्ये व्यसनमुक्तीबाबत जनजागृती करून निरोगी, सुदृढ आणि सक्षम भारत घडविण्यासाठी प्रत्येकाने सक्रिय योगदान देण्याचा निर्धार यावेळी व्यक्त करण्यात आला.
राजर्षी शाहू महाराज यांच्या विचारांचा वारसा जपण्याचा तसेच सामाजिक समता, शिक्षण, लोककल्याण आणि सुशासनाची मूल्ये अधिक बळकट करण्याचा संकल्प उपस्थितांनी यावेळी व्यक्त केला.
राजर्षी शाहू महाराज यांच्या कार्याचा आदर्श डोळ्यासमोर ठेवून जिल्हा परिषद, कोल्हापूर ही संस्था समाजहिताच्या विविध योजनांच्या प्रभावी अंमलबजावणीसाठी आणि सर्वसामान्य नागरिकांच्या सर्वांगीण विकासासाठी सातत्याने कार्यरत राहील, असा विश्वास याप्रसंगी व्यक्त करण्यात आला.
