पुणे : महाराष्ट्र विधान परिषदेच्या पुणे विभाग पदवीधर मतदार संघ आणि पुणे विभाग शिक्षक मतदार संघाच्या निवडणुकीचा कार्यक्रम जाहीर झाल्यामुळे आदर्श आचारसंहिता तत्काळ प्रभावाने लागू झाली आहे. त्यानुसार सर्व राजकीय पक्षांनी भारत निवडणूक आयोगाच्या आचारसंहितासंबंधित निर्देशांचे काटेकोर पालन करावे, असे आवाहन निवडणूक निर्णय अधिकारी तथा विभागीय आयुक्त शीतल तेली – उगले यांनी केले आहे.
या निवडणुकीत मतदान करता यावे म्हणून नामनिर्देशनपत्र दाखल करण्याच्या अंतिम दिनांकाच्या १० दिवस अगोदरपर्यंत नवीन मतदार नोंदणीसाठीच्या दाखल अर्जांवर कार्यवाही करता येईल, अशी माहितीदेखील त्यांनी दिली.
भारत निवडणूक आयोगाने या निवडणुकांची घोषणा मंगळवारी (दि. २२ सप्टेंबर) केली आहे. या निवडणूक कार्यक्रमाची व निवडणूक आयोगाच्या मार्गदर्शक सूचनांची माहिती राजकीय पक्षांना देण्यासाठी विभागीय आयुक्त कार्यालयात आयोजित बैठकीत त्या बोलत होत्या. यावेळी विभागातील पुणे जिल्ह्यातील राजकीय पक्षांचे प्रतिनिधी प्रत्यक्ष तर सोलापूर, सातारा, कोल्हापूर व सांगली जिल्ह्यातील प्रतिनिधी दूरदृष्यप्रणालीद्वारे उपस्थित होते. पाचही जिल्ह्यातील जिल्हा निवडणूक प्रशासन, पोलीस प्रशासन, महानगरपालिका आदींचे अधिकारी, प्रतिनिधी उपस्थित होते.
भारत निवडणूक आयोगामार्फत घेण्यात येणाऱ्या सार्वत्रिक वा पोटनिवडणुकांसाठींच्या आचारसंहिताविषयक तरतुदी या निवडणुकीसाठीही लागू असतात, अशी माहिती देऊन विभागीय आयुक्त म्हणाल्या, या आचारसंहिता विषयक तरतुदींचे मार्गदर्शक पुस्तिका जिल्हा निवडणूक प्रशासनाकडून तसेच आयोगाच्या आणि राज्याचे मुख्य निवडणूक अधिकारी यांच्या संकेतस्थळावरून उपलब्ध होतील. विभागातील सर्व जिल्हाधिकारी हे त्या- त्या जिल्ह्यासाठी सहायक निवडणूक निर्णय अधिकारी असणार आहेत.
त्यांनी पुढे सांगितले, या निवडणुकीसाठी मतदान करता यावे यासाठी नव्याने मतदार नोंदणीची संधी सर्वसाधारणपणे २६ सप्टेंबरपर्यंत असणार आहे. यासाठीचे अर्ज पदनिर्देशित अधिकाऱ्यांकडे जमा करावेत. त्यांची यादी जिल्हाधिकारी कार्यालय, उपविभागीय अधिकारी कार्यालय, तहसील कार्यालयात उपलब्ध आहे. जानेवारी २०२६ मध्ये प्रसिद्ध करण्यात आलेल्या यादीनुसार पुणे विभागात ३ लाख ७ हजार ८२३ पदवीधर तर ५१ हजार ७५० शिक्षक मतदार आहेत. त्यानंतर झालेल्या मतदार नोंदणीची व नव्याने २६ सप्टेंबरपर्यंत होणाऱ्या मतदार नोंदणीनुसार मतदार संख्येत बदल होणार असून त्याप्रमाणे मतदारांना मतदान करता येणार आहे.
या निवडणूकीतील मतदान मतपत्रिकेद्वारे पसंतीक्रम नोंदवून करण्यात येते. त्यादृष्टीने निवडणूक प्रशासन जनजागृती करत आहे. राजकीय पक्ष आणि उमेदवारांनी नामनिर्देशन दाखल करताना घ्यावयाची काळजी, छाननी, निवडणूक खर्चावरील मर्यादा आदींचे पालन करावे. त्याबाबत सर्व सूचना आयोगाच्या मार्गदर्शक पुस्तिकांमध्ये उपलब्ध आहेत, त्यानुसार कार्यवाही करावी, असे आवाहनही श्रीमती तेली-उगले यांनी केले.
यावेळी राजकीय पक्षांनी उपस्थित केलेल्या शंकांचे निरसन विभागीय आयुक्तांनी केले.
असा आहे निवडणूक कार्यक्रम:
निवडणुकीची अधिसूचना २९ सप्टेंबर २०२६ रोजी प्रसिद्ध होणार आहे. उमेदवारी अर्ज दाखल करण्याची अंतिम तारीख ६ ऑक्टोबर, अर्जांची छाननी ७ ऑक्टोबर, तर उमेदवारी अर्ज मागे घेण्याची अंतिम तारीख ९ ऑक्टोबर २०२६ आहे. मतदान २३ ऑक्टोबर रोजी सकाळी ८ ते सायंकाळी ४ या वेळेत होईल. मतमोजणी २७ ऑक्टोबर रोजी करण्यात येणार असून, निवडणूक प्रक्रिया ३१ ऑक्टोबर २०२६ पूर्वी पूर्ण केली जाणार आहे.
