कोल्हापूर : कोल्हापूर शहरासह परिसराला विजांचा कडकडाट, वादळी वाऱ्यासह गारांच्या पावसाने चांगलेच झोडपून काढले. वादळी वाऱ्यामुळे शहरातील अनेक ठिकाणी झाडे उन्मळून विद्युत तारांवर कोसळल्याने काही काळ विद्युतपुरवठा खंडित झाला.
दिवसभराच्या उकाडय़ानंतर गुरुवारी सायंकाळी वादळी वारा, विजांच्या कडकडाटासह मुसळधार पावसाने कोल्हापूरला गुरूवारी सायंकाळी झोडपून काढले. पाऊस झाल्याने वातावरणात गारवा निर्माण झाला; परंतु वीजपुरवठा खंडित झाल्याने नागरिक हैराण झाले होते. मुसळधार पाऊस झाल्याने जनजीवन विस्कळीत झाले. अचानक आलेल्या पावसामुळे नागरिकांची तारांबळ उडाली.
कोल्हापूर शहरात अनेक ठिकाणी वृक्ष उन्मळून पडले तर काही ठिकाणी झाडांच्या फांद्या विजेच्या खांबावर पडल्याने खांब जमीनदोस्त झाले. कोल्हापूर जिल्हा परिषदे जवळील मोहिते इंग्लिश स्कूलजवळील मोठा विजेचा खांब कोसळला.
दरम्यान, शहरातील अनेक रस्त्यांवर पाणी साचले होते.
