मुंबई : काँग्रेसचे देगलूर विधानसभा मतदारसंघातील आमदार जितेश अंतापूरकर यांनी आपल्या पक्षात पक्ष सदस्यत्वाचा राजीनामा दिला असून, ते आज भाजपमध्ये प्रवेश करणार असल्याची माहिती आहे. विधानपरिषद आणि राज्यसभा निवडणुकीत काँग्रेस पक्षाचे काही मते फुटली होती. यामध्ये काँग्रेसचे काही आमदार हाय कमांडच्या रडारवर असल्याची चर्चा होती.
क्रॉस वोटिंग करणाऱ्या आमदारांमध्ये जितेश अंतापुरकर यांच्या नावाचा समावेश होता. तसेच ते महायुतीमध्ये सोबत जातील अशी चर्चा रंगली होती. आज जितेश अंतापुरकर यांचा विधिमंडळाने राजीनामा स्वीकारत, गॅजेट काढले आहे. आज संध्याकाळी अंतापुरकर भाजपमध्ये प्रवेश करणार आहेत. भाजप नेते आणि उपमुख्यमंत्री देवेंद्र फडणवीस, भाजपचे प्रदेशाध्यक्ष चंद्रशेखर बावनकुळे, खासदार अशोक चव्हाण यांच्या उपस्थितीत जितेश अंतापुरकर यांचा पक्षप्रवेश पार पडणार आहे.
