कोल्हापूर: दारात स्वागतासाठी रेखाटलेली रांगोळी, वेगवेगळ्या रंगाच्या परिधान केलेल्या साड्या, ड्रेस .. चेहऱ्यावर विलक्षण आनंद… क्षणाक्षणाला एकमेकींकडे बघून बदलणारे भाव… आणि 1999 च्या दहावी बॅचच्या मुलींनी भरलेला इचलकरंजीतील श्री स्वामी विवेकानंद शिक्षण संस्थेच्या गर्ल्स हायस्कूलचा तो आवारा… सगळंच अवर्णनीय… प्रसंग होता 1999 च्या सालातील माजी विद्यार्थिनींचा गेट-टुगेदर समारंभ सोहळा…
श्री स्वामी विवेकानंद शिक्षण संस्था गर्ल्स हायस्कूलच्या माजी विद्यार्थिनींचा गेट-टुगेदर चा सोहळा अतिशय रंगतदारपणे पार पडला. आनंद, उत्साह आणि साधारण पंचवीस वर्षानंतर एकत्रितपणे आपल्या मैत्रिणींना आणि शिक्षकांना भेटण्याचा विलक्षण आनंद यावेळी विद्यार्थी मैत्रिणींनी मनमुराद लुटला.. आपल्या आठवणीतले क्षण सांगताना काही शिक्षक भावुक झाले तर काही माजी विद्यार्थिनींनी आपल्या आठवणीतून शाळेबद्दल व शिक्षकांबद्दल आपली कृतज्ञता व्यक्त केली.
आपल्या जबाबदारीतून मुक्त होऊन.. काहींनी दूरवरचा प्रवास करत शाळा गाठली तर काही काही विद्यार्थिनींनी आपल्या नोकरी आणि संसारातून वेळ काढून आपल्या आवडत्या मैत्रिणीना आणि शिक्षकांना भेटण्यासाठी शाळेची वाट धरली… रंगीबेरंगी बलून्स, फनी गेम्स, संगीत खुर्ची यांसारख्या अनेक गोष्टींचा मनमुराद आनंद विद्यार्थिनींनी लुटला… नाश्ता आणि लज्जतदार भोजनाचा आस्वाद घेत माजी विद्यार्थिनींनी यावेळी शाळेतील अनेक आठवणींना वाट करून दिली.
शाळेची उंच इमारत… अनेक माजी विद्यार्थिनी… अनेक आजी-माजी शिक्षक आणि शाळेतील आठवणींचा बाजार आणि शाळेतूनच वेगवेगळ्या पदावर गेलेल्या अनेक विद्यार्थिनींचा सन्मान सोहळा यामुळे सर्वच विद्यार्थीनी भारावून गेल्या होत्या… अतिशय उत्साहात आणि आनंदात हा सोहळा प्रशालेच्या प्रांगणात यशस्वीरित्या पार पडला..
