कोल्हापूर : महाराष्ट्र राज्य स्थापनेच्या 62 व्या वर्धापन दिनानिमित्त ध्वजारोहणाचा मुख्य शासकीय समारंभ रविवार दि. 1 मे रोजी सकाळी 8 वाजता छत्रपती शाहू स्टेडियम, कोल्हापूर येथे पालकमंत्री सतेज ऊर्फ बंटी पाटील यांच्या हस्ते होणार आहे.
तसेच तालुकास्तरीय मुख्य शासकीय समारंभ विधानसभा/ विधान परिषद सदस्य / तहसिलदार यांच्या हस्ते होणार आहे. समारंभास स्थानिक लोकप्रतिनिधी, स्वातंत्र्य सैनिक, शहिद जवानांच्या पत्नींना व आई-वडिल तसेच कोरोनायोध्दा जसे डॉक्टर्स, सफाई कामगार, आरोग्य सेवक यांच्यासह या आजारावर मात केलेल्या काही मर्यादित नागरिकांनीच उपस्थित रहावे, असे आवाहन निवासी उपजिल्हाधिकारी शंकराराव जाधव यांनी केले आहे.
मुख्य शासकीय समारंभात नागरिकांना उपस्थित राहता यावे म्हणून सकाळी 7.15 ते 9 च्या दरम्यान कोणत्याही शासकीय अगर निमशासकीय कार्यालयांनी ध्वजारोहणाचा कार्यक्रम आयोजित करु नये. ज्यांना असा स्वतंत्र ध्वजारोहणाचा कार्यक्रम आयोजित करावयाचा आहे, त्यांनी तो 1 मे रोजी सकाळी 7.15 पूर्वी किंवा 9 च्या नंतर करावा. दि. 1 मे रोजी ज्या ठिकाणी दरवर्षी राष्ट्रध्वज उभारला जातो, अशा सर्व शासकीय इमारतींवर, किल्यांवर, तसेच ऐतिहासिक महत्वाच्या ठिकाणी राष्ट्रध्वज उभारण्यात यावेत.
प्लॅस्टिकच्या राष्ट्रध्वजाचा वापर करु नका
राष्ट्रध्वजाचा योग्य तो मान राखला जावा तसेच त्याचा अवमान होऊ नये, यासाठी प्लॅस्टिकच्या राष्ट्रध्वजाचा वापर होणार नाही, याची दक्षता घ्यावी, असे आवाहन निवासी उपजिल्हाधिकारी शंकरराव जाधव यांनी केले आहे. स्थानिक पातळीवर नागरिकांनी तसेच जिल्हा, तालुका, ग्रामपंचायत, मंडळे, महामंडळे, स्थानिक स्वराज्य संस्था, माध्यमिक शाळा, कनिष्ठ महाविद्यालये, आरोग्य संस्था अशा शासकीय-निमशासकीय यंत्रणा तसेच स्वयंसेवी संस्था व स्थानिक पोलीस यंत्रणा यांनी प्लॅस्टिकच्या राष्ट्रध्वजाचा वापर होणार नाही व अशा प्रकारांना आळा बसेल याची दक्षता घेण्याचे आवाहन जाधव यांनी केले आहे. तसेच समारंभानंतर रस्त्यावर किंवा इकडे तिकडे पडलेले राष्ट्रध्वज योग्य तो मान राखून ध्वजसंहितेतील तरतुदीनुसार नष्ट करण्याचे आवाहनही त्यांनी केले आहे.
