कोल्हापूर- जगामध्ये अनेक संस्कृती आहेत. त्या मानवी संस्कृतींच्या विविध रूपांचा माणूस म्हणून आदर केला
पाहिजे. विदेशी भाषा आत्मसात करणाऱ्या विद्यार्थ्यासाठी हे खूप महत्वाचे आहे, असे प्रतिपादन शिवाजी विद्यापीठाच्या विदेशी
भाषा अधिविभागप्रमुख डॉ.मेघा पानसरे यांनी आज येथे केले.
शिवाजी विद्यापीठाच्या विदेशी भाषा अधिविभागातर्फे विविध देशांच्या कलांचे दर्शन घडविणाऱ्या कार्निव्हल-2025 या
कला-सांस्कृतिक महोत्सवाच्या सांगता समारंभामध्ये मार्गदर्शन करताना डॉ.पानसरे बोलत होत्या. कार्यक्रमाचे आयोजन
वनस्पतीशास्त्र अधिविभागाच्या नीलांबरी सभागृहात करण्यात आले होते.
डॉ. पानसरे म्हणाल्या, जगामध्ये स्थलांतर होत असतात, मानवी समूह एकमेकांमध्ये मिसळत असतात. त्यावेळी या
विदेशी भाषांचा चांगला उपयोग होतो. शिक्षणासाठी, व्यवसायासाठी, नोकरीसाठी परदेशात जाणाऱ्यांना या विदेशी भाषा अवगत
असणे खूप महत्वाचे असते. विदेशी भाषा शिकणाऱ्या विद्यार्थ्यांनी भाषेचा सातत्याने सराव केल्यास ती जागतिक भाषा आणि त्या
देशातील संस्कृती कायम स्मरणात राहते.
सुरूवातीला विदेशी भाषेमध्ये उत्तीर्ण झालेल्या विद्यार्थ्यांना मान्यवरांच्या हस्ते प्रमाणपत्र देऊन गौरविण्यात आले.
तद्नंतर, निधी सावर्डेकर यांच्या जर्मन सोलोवर आधारित भरतनाटय्म या नृत्याने कार्यक्रमाची सुरूवात झाली. जपान,
जर्मनी, रशिया आणि पोर्तुगीज देशांचे सोलो गाणे, कविता, समूहगीते, कथा-कथन, नाटक अशा बहारदार विविधांगी एकोणीस
कार्यक्रमाचे दर्शन विदेशी भाषा अधिविभागाच्या विद्यार्थ्यांनी घडविले. कार्यक्रमास उपस्थित विद्यार्थ्यांचा उत्स्फुर्त प्रतिसाद लाभला.
राजवर्धन पाटील आणि निधी सावरडेकर यांनी सूत्रसंचालन केले, तर एेश्वर्या चव्हाण यांनी आभार मानले.
याप्रसंगी ज्योती पाटील, प्रियांका माळकर, गितांजली शहा, स्नेहल शेटे, डॉ.अनिल घुले यांच्यासह विद्यार्थी-विद्यार्थीनी
मोठया संख्येने उपस्थित होते.
