कुंभोज ( विनोद शिंगे)
श्री अतिशय क्षेत्र बाहुबली पहाडावर वार्षिक विशाळी यात्रा महोत्सव अतिशय उत्साहामध्ये संपन्न झाले.
या कार्यक्रमासाठी प्रमुख अध्यक्ष म्हणून महावीर रावसाहेब पाटील वळीवडे,अध्यक्ष १००८ भगवान पार्श्वनाथ दिगंबर जैन मंदिर, वळीवडे तर प्रमुख पाहुणे म्हणून सुकुमार जिन्नाप्पा किणींगे, बुबनाळ, संस्थापक चेअरमन जय-जिनेद्र उद्योग समूह, बुबनाळ यांच्या प्रमुख उपस्थितीत हा कार्यक्रम संपन्न झाला. या कार्यक्रमाची सुरुवात सकाळी ९ वाजता पहाडावर ध्वजवंदनाने झाली. त्यानंतर प्राचीन भगवान बाहुबली भगवंतांचा मस्तकाभिषेक संपन्न झाला. व मुख्य कार्यक्रमाला सुरुवात झाली.
या कार्यक्रमाची सुरुवात गुरुकुल विद्यार्थ्यांनी मंगलाचरणाने केली.प्रतिमापूजन व दीप प्रज्वलन मान्यवरांच्या शुभहस्ते संपन्न झाले. यानंतर कार्यक्रमाचे स्वागत नेमिनाथ बाळीकाई, पर्यवेक्षक, एम. जी. शहा विद्यामंदिर व ज्युनिअर कॉलेज, बाहुबली यांनी केले. प्रास्ताविकामध्ये त्यांनी संपूर्ण पहाडाचा इतिहास सांगितला. येथून पुढील काळामध्ये आपण सर्वजण त्याचे संरक्षण करण्याची आवश्यकता आहे असे सांगितले. अतिथी परिचय श्री बाहुबली क्षेत्र दिगंबर जैन एन्टोमेंट ट्रस्ट, कुंभोजचे, बाबासो चौगुले यांनी करून दिला.त्यानंतर अतिथींचा सन्मान प्रमुख मान्यवरांच्या उपस्थितीत संपन्न झाला.
या कार्यक्रमाचे प्रमुख पाहुणे सुकुमार किणींगे यांनी आपल्या मनोगतामध्ये बाहुबली क्षेत्रावरील केलेले कार्य अतिशय उल्लेखनीय आहे. इथून पुढच्या काळात देखील अशाच पद्धतीने आपल्या हातून चांगले कार्य घडत रहो, अशा शुभेच्छा त्यांनी दिल्या. तसेच त्यांनी या पहाडावरील विकासासाठी २५ हजार रुपयाची दानराशी देणगीच्या स्वरूपात दिले. या कार्यक्रमाचे प्रमुख अध्यक्ष महावीर पाटील यांनी आपण जर चांगले काम केलो तर आपल्या बाबतीत चांगलेच घडत राहणार, अशी भावना त्यांनी व्यक्त केली व त्यांनी सुद्धा पुढील कार्यास शुभेच्छा दिल्या. त्यांनी सुद्धा पहाडाच्या विकासासाठी २५ हजार रुपयांची देणगी दिली.
श्री बाहुबली क्षेत्र दिगंबर जैन एंडोमेंट ट्रस्ट, कुंभोजचे विश्वस्त मंडळातील सदस्य प्रदीप पायगोंडा पाटील यांनी पहाडावरती कोल्ड वॉटर मशीन दिले, त्यांचा देखील सत्कार करण्यात आला.
श्रीमती कस्तुरी नरसगोंडा पाटील वसगडे (सांगली) यांनी सुद्धा पहाडासाठी २५ हजार रुपयांची दान राशी देणगीच्या स्वरूपात दिले.
या कार्यक्रमासाठी श्री बाहुबली क्षेत्र दिगंबर जैन एंडोमेंट ट्रस्ट, कुंभोजचे अध्यक्ष बाबासाहेब पिरगोंडा पाटील, व उपाध्यक्ष अप्पासाहेब अण्णा चौगुले हे उपस्थित होते. तसेच सर्व विश्वस्त मंडळ देखील उपस्थित होते. या कार्यक्रमासाठी एम.जी. शहा विद्यामंदिर व ज्युनिअर कॉलेजचे मुख्याध्यापक व बाहुबली ब्रह्मचर्याश्रम व विद्यापीठाचे संचालक, गोमटेश बेडगे, उपमुख्याध्यापक अनिल हिंगलजे, पर्यवेक्षक नेमिनाथ बाळीकाई, तांत्रिक विभाग प्रमुख रवींद्र देसाई व व्यवसाय विभाग प्रमुख अरुण चौगुले हे देखील उपस्थित होते. या कार्यक्रमासाठी पंचक्रोशीतील सर्व जैन श्रावक-श्राविका मोठ्या प्रमाणात उपस्थित होते.शेवटी आभार अमोल कुगे यांनी केले.सूत्रसंचालन सुदर्शन चौगुले व अशितोष व्हनवाडे यांनी केले.
