कोल्हापूर : कोल्हापूर शहरातील विविध विषयांसंदर्भात आमदार अमल महाडिक यांनी महापालिका आयुक्त तथा प्रशासक के. मंजूलक्ष्मी यांची भेट घेतली. यावेळी कोल्हापूर शहरातील बंद सिग्नल यंत्रणेबाबत विचारणा केली असता, शहर अभियंता नेत्रदीप सरनोबत यांनी नादुरुस्त सिग्नलच्या दुरुस्तीचे काम पूर्ण झाले असून शहर वाहतूक शाखेसोबत समन्वय ठेवण्यात येत आहे असे सांगितले.
शहरातील कचरा व्यवस्थापनाच्या दृष्टीने इंदोर शहरातील कचरा व्यवस्थापन प्रकल्पाचा अभ्यास दौरा करण्याचा सल्लाही अमल महाडिक यांनी अधिकाऱ्यांना दिला. त्याचबरोबर जिल्हा परिषद आणि महापालिकेच्या संयुक्त विद्यमाने नवीन जागेची पाहणी करून शासनाकडे कचरा प्रक्रिया प्रकल्पासाठी प्रस्ताव सादर करावा आपण यासाठी पाठपुरावा करू अशी ग्वाही दिली. त्याचबरोबर नवीन 30 घंटागाड्या आणि एलईडी स्ट्रीट लाईट खरेदीसाठीही प्रस्ताव सादर करण्याची सूचना केली. शहरातील प्रमुख उद्यानांच्या सुशोभीकरणासाठी एमआयडीसी मधील मोठ्या कंपन्यांकडे सीएसआर फंड ची मागणी करावी.
या सी एस आर फंड मधून उद्यानांमध्ये सुधारणा तसेच देखभाली साठी खर्च करावा. आपण स्वतः कंपन्यांच्या अधिकाऱ्यांसोबत बैठक घेऊ असा विश्वास यावेळी उपस्थितांना दिला.कोल्हापूर शहरातील अतिक्रमण निर्मूलन मोहिमेचाही आढावा घेताना शहरातील प्रमुख रस्ते अतिक्रमणमुक्त झालेच पाहिजेत याचा पुनरुच्चार केला.
कोल्हापूर महानगरपालिकेच्या जरग नगर आणि विक्रमनगर या दोन शाळा दत्तक घेण्याचा मानस व्यक्त केला तसेच महापालिकेच्या शाळांमध्ये सीसीटीव्ही यंत्रणा कार्यान्वित करणे, डिजिटल क्लासरूम ची उपलब्धता करणे यासाठी प्रयत्नशील राहण्याची ग्वाही दिली. रंकाळा प्रदूषण आणि पंचगंगा प्रदूषण मुक्तीच्या अनुषंगाने कृती आराखडा तयार करून शासनाकडे सादर करावा. पर्यावरण मंत्री पंकजा मुंडे यांच्या माध्यमातून यासाठी निधी उपलब्ध करून दिला जाईल.शहरातील रस्त्यांसाठी नगरोत्थानमधून अतिरिक्त निधी आणण्यासाठी प्रयत्न केले जातील अशी ग्वाही दिली.
