कुंभोज (विनोद शिंगे)
गांधीनगर (ता. करवीर) येथे रात्री उशिरा विठ्ठल सुभाष शिंदे (वय २४, मूळ गाव परभणी, सध्या रा. कोयना वसाहत, गांधीनगर) या तरुणाचा तलवार आणि कोयत्याने वार करुन निर्घृण खून करण्यात आला. सुमारे पाच ते सहा संशयित मारेकरी हे येथील इंदिरानगर झोपडपट्टीतील असल्याचे समजते. रात्री उशिरा घडलेल्या या घटनेने परिसरात खळबळ उडाली.
याबाबत मिळालेली माहिती अशी की, विठ्ठल हा आपल्या आई, वडिल, बहिण आणि भावासोबत येथे भाड्याच्या घरात राहत होता. रात्री साडेअकराच्या दरम्यान ही घटना घडली. येथील गांधी मैदानाच्या मागील बाजूस असणाऱ्या पान शॉपपासून मारेकऱ्यांनी विठ्ठल याला तलवार आणि कोयत्याचे वार करत बाजूच्या जीपी ग्रुपपर्यंत आणले त्याठिकाणी त्याला मारुन टाकून मारेकरी पळून गेले. मारेकऱ्यांनी विठ्ठलच्या हातावर तसेच चेहऱ्यावर तलवार आणि कोयत्याने वार केले होते.
विठ्ठल आणि मारेकरी हे गांजेकस, व्यसनी असल्याचे समजते. विठ्ठल हा येथील एका दुकानात नोकरी करत होता. खुनाचे नेमके कारण समजू शकले नाही. दरम्यान घटनास्थळी अतिरिक्त पोलीस अधीक्षक जयश्री देसाई, पोलीस उपअधीक्षक सुजितकुमार क्षीरसागर, स्थानिक गुन्हा अन्वेषणचे पोलीस निरीक्षक रविंद्र कळमकर यांनी भेट दिली. अधिक तपास सहाय्यक पोलीस निरीक्षक डॉ. सागर वाघ करत आहेत.
