नाशिक : येवला तालुक्यातील आंबेवाडी येथे नगर – मनमाड राज्य मार्गावर हुंडाई कारचा अपघात झाल्याची घटना घडली आहे. या अपघातात दोन जण ठार झाले असून एक जण गंभीर जखमी आहे. हि घटना आज शुक्रवारी पहाटे घडली.
याबाबत अधिक माहिती अशी की, आज पहाटे नगर – मनमाड राज्य मार्गावर कारला अज्ञात वाहनाने पाठीमागून जोरदार धडक दिली. यामुळे हुंडाई कार सुमारे 30 ते 40 फूट लांब रस्त्याच्या कडेला फेकली गेली. या अपघातात कारचा अक्षरशः चक्काचूर झाला आहे. मित्राला मनमाड रेल्वे स्थानकावर सोडण्यासाठी जात असताना अपघात झाल्याची माहिती समोर येत आहे.
या भीषण अपघातात दोन जणांचा मृत्यू झाला तर एक जण गंभीर जखमी आहे. अपघातग्रस्त गाडीचा पत्रा कापून गंभीर जखमी व मृतदेह बाहेर काढण्यात आले. आकाश रमेश पवार, निलेश दगु शेवाळे असे अपघातात मृत झालेल्यांची नावे आहेत. तर शुभम गंगाधर पानमळे हा चालक गंभीर जखमी झाला आहे. अपघाताची माहिती मिळताच पोलीस घटनास्थळी दाखल झाले. जखमीला उपचारासाठी तातडीने रुग्णालयात दाखल करण्यात आले आहे. पोलीस पुढील तपास करत आहेत.
