कोल्हापूर : केशवराव भोसले नाट्यगृहाला आग लागल्याने कोल्हापूरकरांनाच नव्हे तर राज्यभरातील रंगकर्मींना जबरदस्त धक्का बसला आहे. या नाट्यगृहाच्या पुनर्बांधणीसाठी अनेक आघाडीच्या रंगकर्मीनी पुढे येण्याची तयारी दर्शवली आहे. त्यामध्ये प्रामुख्याने सुबोध भावे, अवधूत गुप्ते, सचिन खेडेकर, मकरंद अनासपुरे यांनी हे थिएटर पुन्हा दिमाखदार सुरू करण्यासाठी लागेल ती मदत करू असे सांगितले . कोल्हापुरातील अनेक सामाजिक संस्थाही मदत करण्यासाठी तयार झाल्या असल्याचे चित्र दिसत आहे.
केशवराव भोसले नाट्यगृहाला आग लागल्याने कलाप्रेमी, कोल्हापूरकरांना दुःख झाले आहे. पण त्यातूनही खचून न जाता या नाट्यगृहाला मूळ रूप देण्यासाठी सर्वांचे तयारी दिसून येत आहे. अनेक सामाजिक संस्था , उद्योजक, व्यापारी , देणगीदार यांनी या कामी आवश्यक ती मदत देण्यास तत्पर असल्याचे सांगितले . तर दुसरीकडे गायन समाज देवल क्लबचे संचालक चारुदत्त जोशी यांनी राज्यातील अनेक रंगकर्मींशी संपर्क साधला असता त्यांनी या कामासाठी सर्वतोपरी मदत करण्याची तयारी दर्शवली आहे. कोल्हापुरातील सर्व कलाकार सोबत आहेतच. त्यामुळे कोल्हापुरकर एकत्र येऊन हा सांस्कृतिक ठेवा पुन्हा उभा करणार, असा विश्वास व्यक्त केला जात आहे. केशवराव भोसले नाट्यगृह आगीत भस्मसात झाल्यानंतर नाट्य – रंगकर्मी शुक्रवारी सकाळी एकत्र येऊन राख संकलित करून ठेवणार आहेत.
