कोल्हापूर (प्रतिनिधी) : जिल्हा परिषद सरळ सेवा भरती 2023 मधील विविध पदांकरिता ऑगस्ट 23 मध्ये जाहिरातीद्वारे उमेदवाराकडून अर्ज मागणी करण्यात आले होते. त्या नुसार आज (शनिवार) 7 ऑक्टोबर पासून संपूर्ण महाराष्ट्रात सरळसेवा भरतीच्या परीक्षांना सुरुवात झाली आहे
कोल्हापूर जिल्ह्यात आज रिंगमन (दो रखंडवाला) आणि वरिष्ठ सहाय्यक लेखा या पदासाठी ऑनलाइन पद्धतीने परीक्षा घेण्यात आली. सदर परीक्षा सुरळीतपणे पार पडली आहे. जिल्ह्यातील विविध केंद्रांवर परीक्षांचे आयोजन करण्यात आले होते ही परीक्षा आयबीपीएस कंपनीमार्फत घेण्यात येत आहे.
आजच्या परीक्षेला रिंगमन या पदाकरीता एकूण 11 उमेदवारांनी अर्ज केला होता त्यापैकी 9 उमेदवार परीक्षेकरिता उपस्थित होते. तसेच वरिष्ठ सहाय्यक लेखा या पदाकरता एकूण 561 उमेदवारांनी कोल्हापूर जिल्ह्यातून परीक्षे करता अर्ज केला होता त्यापैकी 432 उमेदवार प्रत्यक्ष परीक्षेस उपस्थित होते.
जिल्ह्यातील विविध परीक्षा केंद्रांवर रत्नागिरी व सिंधुदुर्ग जिल्हा परिषदे करता अर्ज केलेल्या उमेदवाराची बैठक व्यवस्था करण्यात आली होती परीक्षा केंद्रांना मुख्य कार्यकारी अधिकारी संतोष पाटील उपमुख्य कार्यकारी अधिकारी सामान्य प्रशासन मनीषा देसाई व उपमुख्य कार्यकारी अधिकारी ग्रामपंचायत अरुण जाधव यांनी समक्ष भेटी दिल्या.
उद्या देखील जिल्ह्यातील परीक्षा केंद्रांवर विस्तार अधिकारी सांख्यिकी पदाची ऑनलाइन पद्धतीने परीक्षा होणार आहे. आणि या परीक्षेकरता रत्नागिरी, सिंधुदुर्ग आणि सांगली जिल्ह्यातील उमेदवारांची बैठक व्यवस्था करण्यात आलेली आहे.
