कोल्हापूर : महावितरण कडून लॉकडाऊन काळात दि.१ एप्रिल २०२० पासून २०% वीज दर वाढ करण्यात होती. त्यामुळे संपूर्ण देशात महागडी वीज राज्यात आहे. तरीही आता वीज कंपन्यांकडून वीज दर वाढीचा प्रस्ताव ठेवला आहे.महावितरणची प्रस्तावित दरवाढ रद्द करावी या मागणीसाठी आज आम आदमी पार्टीच्या वतीने तहसीलदार संतोष कणसे यांना निवेदन देण्यात आले.
आपचे प्रदेशाध्यक्ष रंगा राचुरे यांच्या नेतृत्वात आज राज्यभर या विरोधात आम आदमी पार्टी तर्फे आंदोलन करण्यात आले. यावेळी बोलताना आपचे पश्चिम महाराष्ट्र अध्यक्ष संदीप देसाई म्हणाले,शिवसेनेकडून विधानसभा निवडणुकी पूर्वी राज्यातील जनतेला वचन दिले होते की आमचे सरकार आल्यास आम्ही ३०० युनिट घरगुती वापरात ३०% स्वस्त वीज देवू. तसेच बीजेपी कडून विविध राज्यातील निवडणूक जाहीरनाम्यात १०० ते २०० युनिट वीज मोफत देण्याचे जाहीर केले आहे. एवढेच नव्हेतर मागच्या दोन वर्षात देवेंद्र फडणवीस यांनी वीज दर वाढ व मोफत वीज देण्याबाबत अनेक वेळा रस्त्यावर येवून आंदोलने केली आहेत.
दुसरीकडे दिल्ली मध्ये अरविंद केजरीवाल सरकार मागच्या आठ वर्षांपासून २०० युनिट वीज मोफत आणि जास्ती वापर करणाऱ्यांनाही कमीत कमी दरात वीजपुरवठा करीत आहे. तसेच नव्याने सरकार मध्ये आलेल्या पंजाब मधील सरकार ने सुद्धा दि. १ जुलै पासून ३०० युनिट घरगुती आणि शेतकऱ्यांना मोफत वीज केली आहे. ‘जे इतर राज्यात जमते ते महाराष्ट्रात का शक्य नाही?’ असा सवालही यावेळी देसाई यांनी केला.आपल्या राज्यात २.५० ते ३.०० रुपयात प्रती युनिट तयार होणारी वीज १२ ते १८ रुपये प्रति युनिट प्रमाणे दर लावून जनतेची लुट होत आहे. ही लुट थांबविण्यासाठी आम आदमी पार्टी हा मुद्दा घेवून राज्यात गेल्या तीन वर्षापासून सातत्याने आंदोलन करीत आहे.
आता भाजप – शिवसेना सरकार आले आहे. त्यामुळे सर्व आश्वासनांची पूर्तता करण्याची जबाबदारी या युती सरकारवर आहे. त्यामुळे राज्यात दि १ जुलै २०२२ पासून विजेच्या दरात जी १० ते २० % अधिभार लावून वाढ केली ती त्वरित मागे घ्यावी. व मुख्यमंत्री शिंदे हे खरे शिवसैनिक असल्यामुळे ३०% स्वस्त वीज देण्याच्या वचननाम्याची पूर्तता करण्यात यावी अशी मागणीही यावेळी करण्यात आली.
यावेळी पश्चिम महाराष्ट्र अध्यक्ष संदीप देसाई यांच्यासह जिल्हाध्यक्ष निलेश रेडेकर, उत्तम पाटील, सुरेश पाटील, बाळासाहेब जाधव, अभिजित कांबळे, संजय साळोखे, पूजा आडदांडे, मयूर भोसले, किशोर खाडे, समीर लतीफ, रणजित पाटील, सदाशिव कोकितकर, बसवराज हदीमनी, आदी उपस्थित होते.
