कागल: गडहिंग्लज मधील सांस्कृतिक केंद्र, वाचनालय व वडरगे ता.गडहिंग्लज येथील क्रीडा संकुलाचे बांधकाम या करिता एकूण रू १७ कोटी रुपयाचा निधी मंजूर करा. अशी मागणी मुख्यमंत्री एकनाथ शिंदे यांच्याकडे शाहू ग्रुपचे अध्यक्ष व भाजपाचे जिल्हाध्यक्ष राजे समरजितसिंह घाटगे यांनी निवेदनाद्वारे केली आहे.
गडहिंग्लज नगरपरिषदेच्या शहर अंतिम विकास योजना आराखड्यामध्ये सांस्कृतिक केंद्र व वाचनालय करिता क्षेत्र १.०५ हे. आर. आरक्षीत आहे.सध्या ही जमीन नगरपरिषदेच्या ताब्यात आहे.आजरा, चंदगड व गडहिंग्लज या विभागास सांस्कृतिक कलेचा वारसा आहे. या परिसरातील कलावंताना सांस्कृतिक हॉल किंवा नाटयगृहाची सोय नाही. सदर ठिकाणी सांस्कृतिक केंद्र व वाचनालय बांधकाम करणे प्रस्तावित आहे. त्यासाठी सुमारे 15 कोटी निधीची आवश्यकता आहे. आजरा, चंदगड व गडहिंग्लज या विभागास सांस्कृतिक कलेचा वारसा आहे. या परिसरातील कलावंताना सांस्कृतिक हॉल किंवा नाटयगृहाची सोय नाही. त्यासाठी अतिक्रमण विरहीत आरक्षीत जागेवर सांस्कृतिक केंद्र व वाचनालयाचे अंदाजपत्रक व नकाशेही तयार आहेत. या सांस्कृतिक केंद्र व वाचनालय बांधकामासाठी अंदाजे रू. १५ कोटी निधी अपेक्षित आहे.त्यास मंजुरी द्यावी अशी आग्रही मागणी घाटगे यांनी केली आहे.
वडरगेतील क्रीडा संकुलाच्या उर्वरित बांधकामाकरिताही दोन कोटी द्या……
तसेच गडहिंग्लज नगरपरिषदेच्या मालकीची वडरगे रोड येथे जागा उपलब्ध आहे. या जागेवर कीडा संकुल उभा करणे प्रस्तावित आहे. सदर प्रस्तावित क्रीडा संकुलाच्या बांधकामाकरिता सध्या १ कोटी इतका निधी मंजूर आहे. सदरचे बांधकाम सार्वजनिक बांधकाम विभाग यांचेमार्फत चालु आहे. उर्वरित कामाकरिता अपेक्षित आणखी रू. २ कोटी रक्कमेची मागणी घाटगे यांनी केली आहे.या दोन्ही मागण्यांबाबत मुख्यमंत्री शिंदे यांनी सकारात्मकता दर्शवत प्रधान सचिवांना याबाबत पुढील कार्यवाही तातडीने करण्याचे आदेश दिले आहेत.
