कोल्हापूर : महापालिकेच्या महिला स्वच्छतागृहांची नियमित स्वच्छता करावी, लाईट-पाण्याची सोय करावी, येत्या बजेटमध्ये स्वच्छतागृहांसाठी दोन कोटींची तरतूद करावी या मागण्यांचे निवेदन महापालिका उपायुक्त रविकांत अडसूळ यांना देण्यात आले होते. येत्या 8 मार्च पर्यंत यावर सकारात्मक कार्यवाही करावी अशी मागणी ‘आप’ महिला आघाडीच्या वतीने केली गेली होती. परंतु, या मागण्यांकडे महापालिकेने दुर्लक्ष केल्याने आम आदमी पार्टीच्या महिला आघाडीच्या वतीने बिंदू चौक वाहनतळ येथील महिला स्वच्छतागृहा समोर भांडाफोड आंदोलन करण्यात आले.
यावेळी येथील महिला स्वच्छतागृहांच्या परिस्थितीचा महिला आघाडीकडून पर्दाफाश करण्यात आला. बिंदू चौक येथील वाहनतळ येथे ई-टॉयलेट बंद अवस्थेत होते, शेजारील स्वच्छतागृहांची अवस्था अस्वच्छ, वापरण्यास अयोग्य, लाईट व पाण्याचा अभाव असल्याचे महिला आघाडी पदाधिकाऱ्यांनी निदर्शनास आणून दिले.
यावेळी बोलताना आपच्या महिला आघाडी शहराध्यक्षा अमरजा पाटील म्हणाल्या,एकीकडे स्वच्छ व हायजनिक स्वच्छतागृह बांधले जातील असा दावा महापालिका करत आहे, तर दुसरीकडे अस्तित्वात असलेल्या स्वच्छतागृहांची अवस्था किळसवाणी असल्याचे दिसते. त्यामुळे आधी या स्वच्छतागृहांची स्वच्छता राखण्यासाठी महापालिकेने यंत्रणा राबवावी. हा प्रश्न लवकरात लवकर प्रशासनाने मार्गी लावला अन्यथा उग्र आंदोलन करण्याचा इशाराही यावेळी महिला आघाडीकडून देण्यात आला आहे.यावेळी संघटक पल्लवी पाटील, डॉ. उषा पाटील, पूजा आडदांडे, पूनम ठाकरे, वंदना कांबळे यांच्यासह पक्षाचे अन्य कार्यकर्ते उपस्थित होते.
