नागपूर : कोयना धरण प्रकल्पग्रस्तांच्या जमीन वाटपात सोलापूर जिल्ह्यातील एका अधिकाऱयाने एकाच जमिनीचे दोनदा वाटप केल्याचे समोर आले आहे. यावरून सभागृहात संबंधित अधिकाऱ्यावर निलंबनाची कारवाई करण्याची जोरदार मागणी विरोधकांनी केली.त्यावर ‘आम्हाला चारच महिने झालेत आणि तलवार काढायला लावता,’ अशी टोलेबाजी मुख्यमंत्री एकनाथ शिंदे यांनी केली.
‘येत्या दोन महिन्यांत चौकशी करून त्या अधिकाऱ्याचा कार्यक्रम करतो,’ असे ते म्हणाले.कोयना धरणासाठी विस्थापित झालेल्यांना अजूनही जमिनीचे वाटप झालेले नाही. हे काम अजून सुरूच आहे. अशात सोलापूरमधील एका अधिकाऱयाने काही प्रकल्पग्रस्तांना एकाच जमिनीचे दोनदा वाटप केल्याचे समोर आले आहे. आमदार राम शिंदे यांनी हा प्रश्न उपस्थित करत या अधिकाऱयावर तातडीने निलंबनाची कारवाई करण्याची मागणी केली. सरकारने आधी निलंबन करावे आणि मग चौकशी चालू द्यावी, अशी मागणी राम शिंदे यांनी केली. त्यावर दोषी आढळणाऱया अधिकाऱयावर कठोरात कठोर कारवाई करू असे आश्वासन मुख्यमंत्री शिंदे यांनी दिले. शिंदे गटाचे निवडणूक चिन्ह ढाल आणि तलवार आहे. त्याचा उल्लेख करत यावेळी आमदार भाई जगताप यांनी शिंदेंना तुमची तलवार काढा, संबंधित भ्रष्ट अधिकाऱयावर तातडीने कारवाई करा, अशी सूचना केली. त्यावर शिंदे यांनी वरील उत्तर दिले. या समितीत विरोधी पक्षातील नेत्यांनाही स्थान देऊ आणि लवकरात लवकर हा प्रश्न मार्गी काढू, असे त्यांनी सांगितले.
