कागल : महाराष्ट्र शासनाच्या सामाजिक न्याय विभागामार्फत निराधार व आर्थिकदृष्ट्या दुर्बल घटकातील संजय गांधी निराधार योजना, श्रावणबाळ योजना व इंदिरा गांधी वृद्धापकाळ योजनेच्या लाभार्थ्यांना शासनातर्फे दरमहा देण्यात येणाऱ्या एक हजार रुपये पेन्शनमध्ये वाढ करून ती दोन हजार रुपये करावी. अशी मागणी मुख्यमंत्री एकनाथ शिंदे व उपमुख्यमंत्री देवेंद्र फडणवीस यांच्याकडे शाहू ग्रुपचे अध्यक्ष व भाजपाचे जिल्हाध्यक्ष राजे समरजितसिंह घाटगे यांनी निवेदनाद्वारे केली.
निवेदनातील मजकूर असा.संजय गांधी निराधार योजना, श्रावणबाळ योजना व इंदिरा गांधी वृद्धापकाळ योजना लाभार्थ्यांची उत्पन्न मर्यादा एकवीस हजार वरून पन्नास हजार रुपयांपर्यंत करावी, राष्ट्रीय कुटुंब कल्याण योजना दारिद्र्यरेषेखालील कमावत्या व्यक्तीचा मृत्यू झाल्यास वारसास मिळणारी वीस हजार रुपयांची रक्कम तीस हजार रुपये करावी.
गरीब व आर्थिकदृष्ट्या दुर्बल घटकांना मिळणाऱ्या मासिक वेतन अर्थसहाय्यात वाढ करण्यात यावी, अशा विविध मागण्यांचाही यामध्ये समावेश आहे.मुख्यमंत्री शिंदे व उपमुख्यमंत्री फडणवीस यांच्याशी या सर्व विषयांवर सविस्तर चर्चा करून या प्रश्नात तातडीने लक्ष घालून मागण्या पूर्ण कराव्यात अशी विनंती त्यांना यावेळी केली.
