कोल्हापूर : सध्या हवामान बदलाचा प्रभाव संपूर्ण जगभर जाणवत आहे. औद्योगिकीकरण, वायू प्रदूषण आणि वाढते तापमान यामुळे नैसर्गिक आपत्तींचे प्रमाण वाढले आहे. भारतासारख्या कृषिप्रधान देशासाठी मान्सून हा आर्थिक, पर्यावरणीय आणि सामाजिकदृष्ट्या अत्यंत महत्त्वाचा घटक आहे. मात्र, हवामान बदलामुळे भारतीय मान्सूनच्या स्वरूपात मोठे बदल घडत आहेत.अनियमित पर्जन्य, दीर्घकालीन दुष्काळ, अतिवृष्टी आणि पूर यांसारख्या घटनांमुळे शेती, जलसंपत्ती आणि पर्यावरणावर गंभीर परिणाम होत आहेत.
या पार्श्वभूमीवर शिवाजी विद्यापीठ, कोल्हापूरच्या भूगोल अधिविभाग, हवामान बदल आणि शाश्वत केंद्र, पर्यावरण शास्त्र विभाग, संख्याशास्त्र विभाग आणि पतंगराव कदम महाविद्यालय, सांगली यांच्या संयुक्त विद्यमाने ‘हवामान बदल आणि भारतीय मान्सून’ या विषयावर विशेष कार्यशाळेचे आयोजन करण्यात आले आहे. ही कार्यशाळा बुधवार, दिनांक १२ मार्च २०२५ रोजी सकाळी ११.०० वाजता राजर्षी शाहू सभागृह (Senate Hall) येथे होणार आहे. या कार्यशाळेत इंडियन इन्स्टिट्यूट ऑफ ट्रॉपिकल मेट्रोलॉजी (IITM), पुणे येथील सुप्रसिद्ध हवामानशास्त्रज्ञ डॉ. हाफजा वरिकोडण, डॉ. सुरज आणि डॉ. प्रशांत पिल्लई हे मान्सूनवरील हवामान बदलाचा प्रभाव, संभाव्य परिणाम आणि त्यावरील वैज्ञानिक उपाययोजनांबाबत मार्गदर्शन करणार आहेत. कार्यशाळेच्या उद्घाटनप्रसंगी शिवाजी विद्यापीठाचे कुलगुरू डॉ. डी. टी. शिर्के आणि IITM चेवरिष्ठ वैज्ञानिक डॉ. एस. डी. पवार हे प्रमुख पाहुणे म्हणून उपस्थित राहणार आहेत. तसेच, शिवाजी विद्यापीठाचे प्र. कुलगुरू डॉ. पी. एस. पाटील आणि कुलसचिव डॉ. व्ही. एन. शिंदे यांचीही विशेष उपस्थिती लाभणार आहे.
कार्यशाळेतील प्रमुख मुद्दे:
✅ भारतीय मान्सून आणि हवामान बदलाचा प्रभाव
✅ अतिवृष्टी, दुष्काळ आणि तापमानवाढ यांचे विश्लेषण
✅ हवामान अंदाज आणि मॉडेलिंग तंत्रज्ञानाचा उपयोग
✅ हवामान बदलाच्या पार्श्वभूमीवर शाश्वत शेती आणि जलसंधारण उपाययोजना
ही कार्यशाळा संशोधक, प्राध्यापक, विद्यार्थी आणि पर्यावरण तज्ज्ञांसाठी अत्यंत उपयुक्त ठरणार
आहे. हवामान बदलाच्या संदर्भात नवे संशोधन, धोरणे आणि तांत्रिक उपाय समजून घेण्यासाठी ही
महत्त्वपूर्ण संधी आहे.
सर्व संबंधित अभ्यासक आणि संशोधकांनी या कार्यशाळेत सहभागी व्हावे, असे आवाहन शिवाजी
विद्यापीठ, कोल्हापूरतर्फे करण्यात आले आहे.
