कुंभोज (विनोद शिंगे)
हुपरी येथील कल्लाप्पाण्णा आवाडे जवाहर शेतकरी सहकारी साखर कारखाना येथे हुपरी पोलीस ठाणे व महाराष्ट्र राज्य परिवहन उपविभाग इचलकरंजी यांचे वतीने सुरक्षित ऊस वाहतूक अभियान संपन्न झाले.
हुपरी पोलीस ठाण्याचे पोलीस निरीक्षक एन. आर. चौखंडे यांनी, बैलगाडी, अंगद ट्रॅक्टर, ट्रॅक्टर व ट्रक या वाहनांच्या पुढच्या बाजूस पांढर्‍या व मागील बाजूस लाल रंगाची रिफ्लेक्टर पट्टी व रिफ्लेक्टर पडदा वाहनधारकांना कारखान्यामार्फत दिला जातो ते लावणे बंधनकारक आहे. वाहनांवर रिफ्लेक्टर लावलेने ऊस वाहतूक करणार्‍या वाहनांच्या मागून येणार्‍या इतर वाहनांना त्यांच्या समोरील ऊसाचे वाहन सहज दिसून येते. यामुळे रस्त्यावरील अपघात टाळून सर्वांना सुरक्षित प्रवास करणे शक्य होते. एक साधा रिफ्लेक्टर अनेकांचे अनमोल जिव वाचवू शकतो. वाहनांमध्ये क्षमते एवढाच ऊस भरावा, ऊस वाहतूक करताना मोबाईलचा वापर करू नये, मद्यपान करून वाहन चालवू नये, रिकामे वाहन बेदरकारपणे चालवू नये. आपल्या वाहनांची आरटीओ कागदपत्रे, वाहनाचा विमा व वाहनचालकाचा परवाना अद्ययावत असणे आवश्यक असल्याचे सांगितले.
महाराष्ट्र राज्य परिवहन उपविभाग इचलकरंजीचे वरीष्ठ अधिकारी अतुल नांदगावकर यांनी, सुरक्षित ऊस वाहतूक अभियान राबवून वाहतुकीच्या नियमांची व वाहन चालविताना घ्यावयाच्या खबरदारीची माहिती सर्व वाहनचालकांना तसेच सामान्य नागरीकांना व्हावी हा प्रमुख उद्देश आहे. दुचाकीसाठी हेल्मेट तसेच चारचाकी वाहनासाठी सिटबेल्टचा वापर करणे सुरक्षित प्रवासाकरिता अत्यंत आवश्यक आहे. ऊस वाहतूकीच्या सर्व नियमांचे पालन करून सुरक्षित व कौशल्यपूर्ण चालक म्हणून सर्व चालकांनी आपली ओळख निर्माण करावी. यामुळे आपले व सामान्य नागरिकांचे कुटुंबिय सुखा-समाधानात राहतील.
प्रास्ताविकात जनरल मॅनेजर (केन) किरण कांबळे यांनी, कारखान्यामार्फत प्रतिवर्षी सुरक्षित ऊस वाहतूक अभियान आयोजित केले जाते. तसेच सर्व वाहनांना कारखान्याकडून प्रत्येक वर्षी रिफ्लेक्टर पुरविले जात असलेबाबत सांगितले. या अभियानासाठी व्हाईस चेअरमन बाबासाहेब चौगुले, केन कमिटी चेअरमन दादासो सांगावे, ज्येष्ठ संचालक आण्णासो गोटखिंडे, महाराष्ट्र राज्य परिवहन उपविभाग इचलकरंजीचे परिवहन अधिकारी ज्योती पाटील, निकीता नाईक, सहाय्यक पोलीस उपनिरीक्षक हुपरी विजय कनाके व व्हेईकल इनचार्ज सुदेश मेंच, मॅनेजर (एचआर) अनिल वलशेट्टी, उपमुख्य शेती अधिकारी भास्कर पट्टणकुडे, सुरक्षा अधिकारी संजय वासमकर, केनयार्ड सुपरवायझर सुदर्शन जंगले व स्टाफ आणि ऊस वाहतूक वाहन मालक व चालक मोठ्या संख्येने उपस्थित होते. केन कमिटी चेअरमन दादासो सांगावे यांनी आभार मानले.
