कोल्हापूर: शिवाजी विद्यापीठाच्या संगीत व नाट्यशास्त्र अधिविभागामध्ये “रंग-संगीत: प्रस्तावना व परिचय” ही नाट्य व संगीतविषयक दोन दिवसीय कार्यशाळा डॉ. साईश देशपांडे (गोवा) यांच्या मार्गदर्शनाखाली अतिशय उत्साहात पार पडली.
संगीत व नाट्यशास्त्र अधिविभागाच्या सभागृहात दि. ९ व १० जानेवारी असे दोन दिवस संगीत व नाटकांचे गाढे अभ्यासक तथा तज्ज्ञ मार्गदर्शक असलेल्या श्री. देशपांडे यांनी सहभागी विद्यार्थ्यांना प्रात्यक्षिकांसह मार्गदर्शन केले. अभिनय करत असताना नाटकामध्ये संगीताचा वापर कसा करावा, संगीताचे महत्त्व, शारीरिक हालचालीतून, संवादातून संगीत कसे निर्माण होते, पार्श्वसंगीताचा आधार कसा घ्यावा, स्वर, आवाजाची पट्टी, लय, ताल या मूलभूत सांगितिक घटकांनुसार संवादाचे सादरीकरण, उच्चारण कसे असावे, इत्यादी अनेक घटकांच्या अनुषंगाने डॉ. देशपांडे यांनी मार्गदर्शन केले. दोन दिवस चार सत्रांत झालेल्या चाललेल्या कार्यशाळेमध्ये विद्यार्थी मोठ्या संख्येने उपस्थित होते.
उद्घाटन सत्रात अधिविभागप्रमुख डॉ. विनोद ठाकूर-देसाई यांनी पाहुण्यांचे स्वागत केले. रविदर्शन कुलकर्णी यांनी परिचय करुन दिला. महाराष्ट्र राज्य नाट्य स्पर्धेतील डॉ.संजय तोडकर दिग्दर्शित “भाऊबंदकी” नाटकातील यशस्वी विद्यार्थ्यांचा पाहुण्यांच्या हस्ते सत्कार करण्यात आला. कार्यशाळेच्या अखेरीस डॉ. राजश्री खटावकर यांनी आभार मानले.
