कुंभोज (विनोद शिंगे)
हातकणंगले विधानसभा मतदारसंघात गेल्या पाच वर्षांमध्ये सुमारे पावणेतीनशे कोटींची विकासकामे पूर्ण केली आहेत. भविष्यातही मतदारसंघात विकासगंगा आणण्यासाठी महाविकास आघाडीचे उमेदवार म्हणून मला साथ द्या. पुन्हा एकदा आपली सेवा करण्याची संधी द्यावी, असे आवाहन हातकणंगले विधानसभा मतदारसंघाचे राष्ट्रीय काँग्रेस पक्ष, महाविकास आघाडीचे अधिकृत उमेदवार राजूबाबा जयवंतराव आवळे यांनी केले. ते मतदारसंघातील विकासकामांच्या पुस्तक प्रकाशनप्रसंगी बोलत होते.
आवळे म्हणाले, गेल्या पाच वर्षांच्या कालावधीमध्ये आपण मतदारसंघातील प्रत्येक गावाचे नियोजन करून लाखो रुपयांची विकासकामे पूर्ण केली आहेत. या मतदारसंघाने आवळे कुटुंबीयांवर भरभरून प्रेम केले आहे. त्याची उतराई म्हणून मी मतदारसंघातील सर्व जातिधर्माच्या लोकांना बरोबर घेऊन काम करत आहे.पुढील काळातही या मतदारसंघात तरुणांच्या हाताला रोजगार उपलब्ध करून देण्यासाठी प्रयत्नशील राहणार आहे. तसेच महिला सक्षमीकरण, आरोग्य, शैक्षणिक, क्रीडा व सामाजिक आदी समाजोपयोगी उपक्रम राबवून या मतदारसंघाचा चेहरामोहरा बदलण्याचा आपला मानस आहे.
