कोल्हापूर (प्रतिनिधी) : स्वच्छ भारत मिशन अंतर्गत गावोगावी आणि गावातील प्रत्येक कुटुंबापर्यंत स्वच्छतेचे महत्व पटवण्यासाठी , स्वच्छतेबाबत अधिक जनजागृती करुन स्वच्छतेची चळवळ उभी राहण्यासाठी, केंद्र आणि राज्य शासनाच्या पाणी पुरवठा आणि स्वच्छता, विभागाच्या मार्गदर्शक सुचनानुसार एक तारीख एक घंटा (एक तारीख एक तास ) असा उपक्रम 1 ऑक्टोंबर 2023 रोजी सर्व ग्रामपंचायींमध्ये सकाळी 10.00 वा. स्वच्छता श्रमदान करुन राबविणेत येणार आहे. अशी माहिती जिल्हा परिषदचे प्रशासक तथा मुख्य कार्यकारी अधिकारी संतोष पाटील यांनी दिली.
हा उपक्रम लोकसहभागातुन राबविणेत येणार असुन, या उपक्रमात जिल्हयातील सर्व लोकप्रतिनिधी, अधिकारी, कर्मचारी, विद्यार्थी, महीला बचत गट, स्वयंसेवी संस्था, नागरीक यांनी मोठया संख्येन सहभागी व्हावे, असे आवाहन मुख्य कार्यकारी अधिकारी पाटील यांनी केले आहे.
2 ऑक्टोंबर, राष्ट्रपिता महात्मा गांधी यांच्या जयंतीचे औचित्य साधून जिल्हयात दिनांक 15 सप्टेंबर ते दिनांक 2 ऑक्टोंबर 2023 या कालावधीत स्वच्छता ही सेवा 2023 अभियान राबविणेत येत आहे. यानिमित्त 1 ऑक्टोंबर रोजी सकाळी 10.00 वा. जिल्हयातील सर्व ग्रामपंचायतींमध्ये लोकसहभागातुन 1 तास श्रमदानाव्दारे स्वच्छता करण्यात येणार आहे.
सदर उपक्रम राबविण्याकरिता ग्रामपंचायती अंतर्गत जास्त कचरा असलेले क्षेत्र, रेल्वे लाईन, बस स्थानके, विमानतळ, राष्ट्रीय / राज्य महामार्गाच्या शेजारील जागा, जलस्त्रोत,नदीघाट, झोपडपट्टया, पुलाखालच्या जागा, बाजारपेठा,गल्ल्या, धार्मिक स्थळे, सार्वजनिक व खाजगी कार्यालयांचे परिसर, पर्यटन स्थळे, टोलनाके, प्राणी संग्रालय, गो- शाळा, डोंगर, रहिवासी क्षेत्र, आरोग्य संस्था, आसपासचा परिसर, आंगणवाडी परिसर, शाळा व महाविद्यालय परिसर तसेच सदर क्षेत्रातील महत्वाचे ठिकाण अशा ठिकाणांची निवड करण्यात येणार आहे.
श्रमदान उपक्रमावेळी, मी माझा कचरा उघडयावर फेकणार नाही, त्याची योग्य विल्हेवाट लावेन, मी माझ्या घरातील सांडपाणी उघडयावर सोडणार नाही, त्यासाठी घरच्या शेजारी शोष खड्डा करेन, मी माझ्या शौचालयाचा नियमित वापर करेन आणि स्वच्छ ठेवेन अशा प्रकारच्या प्रतिज्ञा घेण्यात येणार आहे.
गावातील स्वच्छता श्रमदान करावयाच्या ठिकाणांची माहीती केंद्र शासनाच्या https://swachhatahiseva.com या पोर्टल वर भरणेत आली असुन, 1 ऑक्टोंबर 2023 रोजी राबविलेल्या उपक्रमाचे फोटो या पोर्टलला अपलोड करण्यात येणार आहेत अशी, माहिती मुख्य कार्यकारी अधिकारी पाटील यांनी दिली .
