कोल्हापूर : २३ मार्च रोजी चैत्रपाडवा महामेळाव्यासाठी दसरा चौकात हजारोंच्या संख्येने मराठा समाज एकवटणार असल्याचे प्रतिपादन मराठा महासंघाचे राष्ट्रीय उपाध्यक्ष वसंतराव मुळीक यांनी केले आहे.
अखिल भारतीय मराठा महासंघाच्यावतीने चैत्रपाडवा महामेळावा नियोजनासाठी मंगळवार पेठ येथे बैठकीचे आयोजन करण्यात आले होते.
या प्रसंगी ते बोलत होते.भगतसिंग, सुखदेव, राजगुरू या क्रांतीकारकांना तसेच मराठा आरक्षणासाठी पहिले बलिदान देणारे अण्णासाहेब पाटील यांना अभिवादन करून मेळाव्याला सुरुवात होईल. या महामेळाव्याच्या नियोजना साठी गावोगावी संपर्क मोहीम व जिल्ह्यात १०० सभांचे तालुकावार नियोजन करण्यात येत आहे.मराठा समाजाच्या मागण्या शासन दरबारी सोडवणुकीसाठी दबाव गट निर्माण करण्यासाठी प्रत्येक वर्षी पाडव्याच्या मुहूर्तावर पाडवा महामेळाव्याचे आयोजन करण्यात येणार आहे.
यामुळे नक्कीच समाज जागृत होईल. महामेळाव्यात मराठा आरक्षणासह आर्थिक विकास महामंडळ, सारथी संस्थेच्या कामकाज, विद्यार्थी युवकांचे प्रश्र,सीमाप्रश्र यावर चर्चा करण्यात येणार असून शासनाकडे अनेक अडचणी या मेळाव्याच्या माध्यमातून सोडविण्याचा प्रयत्न करण्यात येणार आहे. समाज एकसंघ होणे ही काळाची गरज आहे या मेळाव्याच्या माध्यमातून संघटीत शक्तीतून प्रश्न मार्गी लागून समाजाच्या हितासाठी ठोस भूमिका घेता येईल, यासाठी मेळाव्याचे नियोजन करण्यात आले आहे. सभेच्या अध्यक्षस्थानी संभाजीराव जगदाळे होते. प्रास्ताविक शशिकांत पाटील तर स्वागत शैलजा भोसले यांनी केले. यावेळी वृद्ध व्यक्ती,बंधू भगिनींसह कार्यकर्ते मोठ्या संख्येने उपस्थित होते.
