पुणे: कात्रज भागात सिमेंटचे पाइप तयार करणाऱ्या कंपनीतील पाण्याच्या हौदात पडून दोन वर्षांच्या बालिकेचा मृत्यू झाल्याची दुर्देवी घटना घडली. सुरभी विमलकुमार गौतम (वय २) असे मृत्युमुखी पडलेल्या बालिकेचे नाव आहे.
दुर्घटनेस जबाबदार ठरल्या प्रकरणी एकेआरसीसी या कंपनीचे मालक अश्रफ अली खान यांच्या विरोधात गुन्हा दाखल करण्यात आला आहे. याबाबत विमलकुमार शिवशंकरलाल गौतम (वय २६, रा. जांभुळवाडी) याने भारती विद्यापीठ पोलीस ठाण्यात फिर्याद दिली आहे.विमलकुमार गौतम कंपनीच्या आवारात राहायला आहे. विमलकुमारची दोन वर्षांची मुलगी हौदाजवळ खेळत असताना तोल जाऊन त्यात पडली. हौदाजवळ कठडे नसल्याने दुर्घटना घडल्याचे तपासात उघडकीस आले.
