गांधीनगर (प्रतिनिधी) : उंचगाव येथील पुणे-बंगळुरु महामार्गावर झालेल्या अपघातात एकाचा जागीच मृत्यू झाला तर तीन जण गंभीररीत्या जखमी झाले आहेत. जखमींना उपचारासाठी सीपीआर रुग्णालयात दाखल करण्यात आलं आहे.
मिळालेली माहिती अशी की, पुणे-बंगळुरु महामार्गावर काही जण रस्ता ओलांडत होते. यावेळी रस्तावरून जाणाऱ्या एका ट्रकने ब्रेक दाबला आणि वाहन थांबवलं. पण या ट्रकमागून येणाऱ्या दुसऱ्या ट्रकच्या चालकाला वेग नियंत्रित करता आला नाही आणि अनर्थ घडला. समोरच्यांना वाचवण्याच्या नादात ट्रकला मागून जबर फटका बसला. मागून येणारा ट्रक समोरील ट्रकवर जोरात आदळला. ही धडक इतकी भीषण होती, की ट्रकच्या समोरच्या बाजूला अक्षरशः चेंदामेंदा झाला. या अपघातामुळे एकच खळबळ उडाली होती. मागून धडक दिलेल्या ट्रकमधील चार जणांपैकी एकाचा जागीच जीव गेला. तर तीन जण गंभीररीत्या जखमी झाले.
