नवी मुंबई (वृत्तसंस्था) : भाजपचे आमदार राम कदम यांनी ट्वीटरवरुन चार फोटो पोस्ट केले आहेत. या फोटोंमध्ये ५०० रुपयांच्या चलनी नोटेवर छत्रपती शिवाजी महाराज, वीर सावरकर, डॉ. बाबासाहेब आंबेडकर आणि पंतप्रधान नरेंद्र मोदी यांचे फोटो दिसत आहेत. हे फोटो शेअर करताना राम कदम यांनी, “अखंड भारत.. नया भारत.. महान भारत.. जय श्रीराम .. जय मातादी” अशी कॅप्शन दिली आहे.
दिल्लीचे मुख्यमंत्री आणि आम आदमी पक्षाचे प्रमुख अरविंद केजरीवाल यांनी बुधवारी नव्या नोटांवर लक्ष्मी मातेचा आणि गणपतीचा फोटो छापण्याची मागणी केली. या मागणीनंतर देशभरातील प्रमुख पक्षांनी प्रतिक्रिया नोंदवली असताना भारतीय जनता पार्टीने केजरीवाल यांच्यावर टीका केली आहे. तर दुसरीकडे महाराष्ट्रामधील नेत्यांकडूनही याबद्दल प्रतिक्रिया व्यक्त केला जात असतानाच भाजपाचे आमदार राम कदम यांनी या वादात उडी घेतली आहे.
अर्थव्यवस्था बळकट करण्यासाठी आणि देशाला विकसित करण्यासाठी आपल्याला देवी-देवतांचे आशीर्वाद हवेत असं सांगत केजरीवाल यांनी चलनी नोटांवर गणपती आणि लक्ष्मीचे फोटो छापण्याची मागणी केली आहे. नोटांवर महात्मा गांधींचा फोटो तसाच ठेवत दुसऱ्या बाजूला लक्ष्मी आणि गणपतीचा फोटो छापला पाहिजे असं ते म्हणाले. यासंबंधी आपण पंतप्रधान नरेंद्र मोदींना पत्रही लिहिणार आहे असंही त्यांनी सांगितलं. केजरीवाल यांच्या या मागणीनंतर भाजपाकडून केजरीवाल हे ढोंग करत असल्याची टीका झाली. त्यानंतर आज भाजपाचे महाराष्ट्रातील आमदार नितेश राणेंनी आज नोटांवर छत्रपती शिवाजी महाराजांचा फोटो छापावा अशी मागणी केली.
