कोल्हापूर प्रतिनिधी : गेल्या अडीच वर्षांपासून प्रलंबित असलेल्या राज्यातील २८१ बाजार समित्यांचा निवडणूक कार्यक्रम जाहीर करण्यात आला आहे. राज्य सहकारी निवडणूक प्राधिकरणाचे आयुक्त डॉ. जगदीश पाटील यांनी याबाबतची माहिती दिली. यामध्ये कोल्हापूर जिल्ह्यातील कोल्हापूर, गडहिंग्लज, जयसिंगूपर बाजार समित्यांसाठी २९ जानेवारी २०२३ रोजी मतदान होणार आहे.
बाजार समितीच्या निवडणुकीसाठी बाजार क्षेत्रातील कार्यरत प्राथमिक कृषी पत संस्था, बहुउद्देशीय सहकारी संस्था आणि ग्रामपंचायतचे सदस्य मतदार असल्यामुळे सदस्यांची सूची २७ सप्टेंबरपर्यंत बाजार समित्यांच्या जिल्हा निवडणूक अधिकाऱ्यांकडे देण्याचे निर्देश संबंधित जिल्हा उपनिबंधक, सहकारी संस्था तसेच गट विकास अधिकाऱ्यांना दिले आहेत. अंतिम मतदार यादी सात डिसेंबरला प्रसिद्ध होणार आहे, असे डॉ. जगदीश पाटील यांनी सांगितले.
