कागल : कट्टर समरजित घाटगे समर्थक भाजपच्या नगरसेविका सौ. दिपाली भुरले व त्यांचे पती संदीप उर्फ बाळासो भुरले यांनी मुश्रीफ गटात प्रवेश केला. कागलमध्ये झालेल्या या कार्यक्रमात आमदार हसन मुश्रीफ यांनी स्वागतपर सत्कार केला. यामुळे कागलमध्ये नगरपालिका निवडणुकीच्या तोंडावरच समरजित घाटगे गटाला मोठे खिंडार पडले आहे.
याबाबत अधिक माहिती, भाजपच्या नगरसेविका असलेल्या सौ. दिपाली संदीप उर्फ बाळासो भुरले या
कागल नगरपरिषदेतील विरोधी गटनेत्या आहेत. त्यांचे पती संदीप उर्फ बाळासो शिवाजी भुरले हे समरजित घाटगे यांचे कट्टर व निकटचे कार्यकर्ते होते.
यावेळी आमदार हसन मुश्रीफ म्हणाले, गट-तट, पक्ष -पार्टी न मानता आजपर्यंत केलेली राजकीय वाटचाल व सर्वांगीण विकासामुळे जनता आपल्या सोबत आहे. त्या विश्वासातूनच भुरले दांपत्याने आपल्यावर टाकलेला विश्वास सार्थ ठरवू. त्यांच्या पाठीशी हिमालयासारखे उभे राहू.
संदीप उर्फ बाळासो भुरले म्हणाले, आमदार हसन मुश्रीफ यांचे बहुजनांच्या सर्वांगीण कल्याणाचे काम कौतुकास्पद आहे. समरजित घाटगे यांची एकाधिकारशाही व हुकूमशाही पद्धतीच्या कामकाजाला वैतागून घाटगे गट सोडून मी मुश्रीफ गटात प्रवेश करीत आहे.
यावेळी ज्येष्ठ नगरसेवक चंद्रकांत गवळी, माजी नगरसेवक प्रकाशराव गाडेकर, केडीसीसी संचालक प्रताप उर्फ भैया माने, माजी उपनगराध्यक्ष बाबासो नाईक, यशवंतराव गुरव, सौरभ पाटील, अर्जुन नाईक आदी प्रमुख उपस्थित होते.
