मुंबई (वृत्तसंस्था) : मुख्यमंत्री एकनाथ शिंदे यांनी माजी मुख्यमंत्र्यांना पीए ठेवले आहे. त्यामुळे त्यांचे मी आभार मानतो, असा टोला आमदार अमोल मिटकरी यांनी उपमुख्यमंत्री देवेंद्र फडणवीस यांना नाव न घेता लगावला आहे.“आता पत्रकार परिषदेत दोन माईक घेतले आहेत. मुख्यमंत्रिपदाचा आदर केला त्याबद्दल आनंदच आहे. पण एकनाथ शिंदे यांनी माजी मुख्यमंत्र्यांना पीए ठेवलं. याबद्दल मी त्यांचे खरोखर आभार मानतो,” असे अमोल मिटकरी म्हणाले.
मागील काही दिवसांपूर्वी पत्रकार परिषद सुरु असताना उपमुख्यमंत्री देवेंद्र फडणवीसांनी मुख्यमंत्री एकनाथ शिंदे यांच्यासमोरचा माईक खेचला होता. फडणवीसांच्या या कृतीनंतर वेगवेगळ्या प्रतिक्रिया उमटल्या.
यावरदेखील मिटकरी यांनी प्रतिक्रिया दिली. “मागच्या काळात उद्धव ठाकरे मुख्यमंत्री तर अजित पवार उपमुख्यमंत्री होते. उद्धव ठाकरेंना बोलायचे नसल्यास ते उपमुख्यमंत्र्यांना माईक द्यायचे. त्यानंतर अजित पवार प्रास्ताविक करायचे. उद्धव ठाकरे स्वत:हून माईक द्यायचे. देवेंद्र फडणवीसांनी परवा एक चिठ्ठी एकनाथ शिंदे यांना दिली. कोल्हापूरमध्ये शिंदे गटात सामील झालेल्या लोकांची नावे शिंदे यांनी घेतले. मात्र भाजपाच्या महाडिकांचे नाव त्यांनी घेतले नाही. याची सल फडणवीस यांच्या मनात होती. माईक खेचला जातोय. उद्या काय काय खेचले जाईल, हे सांगता येत नाही,” अशी खोचक टीका मिटकरी यांनी केली.
