गुजरात : गुजरात विधानसभा निवडणुकीच्या प्रचाराची रणधुमाळी सुरू झाली आहे.भाजप , काँग्रेस आणि आम आदमी पक्षामध्ये लढत असल्याचे चित्र आहे. भाजपकडून यंदा विक्रमी विजय मिळवण्याचा दावा केला जात आहे. तर, दुसरीकडे काँग्रेसने परिवर्तन होणार असे म्हणत दंड थोपटले आहेत. आम आदमी पक्षानेही भाजप आणि काँग्रेसला आव्हान दिले आहेत. मात्र, ओपनियन पोलमधील निष्कर्षानुसार, गुजरातमध्ये विजय मिळवणे भाजपसाठी सोपी बाब नसल्याचे समोर आले आहे.
गुजरात निवडणुकीसाठी केलेल्याओपिनियन पोलनुसार, भाजपच्या हाती काही प्रमाणात निराशा येण्याची शक्यता आहे. भाजपने 150 जागांवर विजय मिळवणार असल्याचा दावा केला आहे. ओपिनियन पोलनुसार, गुजरातमध्ये भाजपच्या नेतृत्वात सरकार येणार आहे. मात्र, भाजप नेत्यांकडून करण्यात येणारे दावे आणि जमिनीवरील वस्तुस्थिती वेगळी असल्याचे पोलमध्ये आढळले आहे.कोणाला किती जागा?ओपिनियन पोलनुसार, भाजपला 182 पैकी 104 ते 119 जागा मिळण्याची शक्यता आहे. तर, काँग्रेसला 53 ते 68 जागांवर विजय मिळू शकतो. आम आदमी पक्षाला 0 ते 6 जागा मिळू शकते. तर, अपक्ष, इतरांना 3 जागा मिळू शकतात.
