कोल्हापूर :- शहर पाणी पुरवठा विभागाकडील वितरण शाखा व पाणीपट्टी शाखा यांचेमार्फत शहरातील व संलग्न ग्रामीण भागातील अनधिकृत नळ कनेक्शनधारकांचे नळ कनेक्शन खंडीत करणेची संयुक्त मोहीम सुरू आहे. या मोहिमेमध्ये बुधवारी 33 थकबाकीदारांवर कारवाई करुन त्यांचे कनेक्शन खंडीत करणेची कारवाई करण्यात आली आहे. या मोहिमेअंतर्गत दि.10 डिसेंबर 2024 पासून आज अखेर रुपये 1 कोटी 96 लाख 88 हजार 079 इतकी थकीत रक्कम भरारी पथकामार्फत कारवाई करुन रक्कम वसुल करण्यात आली आहे.
सदरची कारवाई प्रशासक के.मंजूलक्ष्मी, अतिरिक्त आयुक्त राहूल रोकडे व जल अभियंता हर्षजित घाटगे यांच्या मार्गदर्शनाखाली करण्यात आली. यामध्ये शाखा अभियंता राजेंद्र हुजरे, मयुरी पटवेगार, प्रिया पाटील, अनुराधा वांडरे, महानंदा सुर्यवंशी तसेच पथक प्रमुख अजित मोहिते, मधु कदम, अमर बागल, नरेंद्र प्रभावळकर, संजय पाटील यांनी केली.
सदरची मोहिम येथून पुढेही सुरु राहणार असून शहरातील सर्व नागरिकांनी आपली अनधिकृत नळ कनेक्शन रीतसर अर्ज करुन व योग्य ते शुल्क भरुन नियमित करुन घ्यावी. अन्यथा पाणी बिलाची रक्कम वेळेवर भरणा न केलेस सदरचे नळ कनेक्शन बंद करणे, वर्तमानपत्रात नाव प्रसिध्द करणे, मिळकतीवर बोजा नोंद करणेची कारवाई करण्यात येणार आहे. त्यामुळे संबंधीत मिळकतधारकांनी असे कटु प्रसंग टाळावेत असे महानगरपालिकेच्यावतीने आवाहन करण्यात आले आहे.
