कोल्हापूर (प्रतिनिधी) मुख्यमंत्री एकनाथ शिंदे कोल्हापूर दौऱ्यावर आले होते. गोकूळ शिरगाव येथील कणेरी मठात विविध कार्यक्रमांच्या उद्घाटनासाठी मुख्यमंत्री कोल्हापुरात आले होते. मात्र, त्यांचा दौरा अत्यंत गुप्त ठेवण्यात आला होता. मराठा आंदोलनाच्या पार्श्वभूमीवर हा दौरा गुप्त ठेवला असल्याची चर्चा आहे. मुख्यमंत्र्याच्या दौऱ्याचा नेहमीच गाजावाजा असतो प्रशासनाची चांगलीच धावपळ उडते मात्र आज ते दबक्या पावलांनी आले आणि निघून गेले.
राज्याचे मुख्यमंत्री एकनाथ शिंदे शनिवारी सायंकाळी कोल्हापुरात दाखल झाले होते. कणेरी मठ येथील गो शाळेच्या आयव्हीएफ केंद्राचं उद्घाटन मुख्यमंत्री शिंदे यांच्या हस्ते झाले. मात्र, या दौऱ्याबाबत कमालीची गुप्तता पाळण्यात आली होती. मराठा आरक्षणाचा प्रश्न सध्या राज्यभर तापला आहे. कोल्हापूर जिल्ह्याचे पालकमंत्री हसन मुश्रीफ यांना रोखण्याचा प्रयत्न झाल्यानं मुख्यमंत्र्यांच्या दौऱ्याबाबत पोलिसांनी खबरदारीचा उपाय म्हणून गुप्तता ठेवली होती.
कणेरी मठाचे मठाधिपती काडसिद्धेश्वर महाराज यांच्याशी मुख्यमंत्री एकनाथ शिंदे यांनी चर्चा केली. मुख्यमंत्र्यांचा हा खासगी दौरा असल्याचं प्रशासनाकडून सांगण्यात येत आहे. मात्र, कणेरी मठावर प्रचंड पोलीस बंदोबस्त तैनात करण्यात आला होता.मराठा आरक्षण आंदोलनामुळं नेत्यांना गावात बंद घालण्यात आली आहे. त्या पार्श्वभूमीवर मुख्यमंत्री एकनाथ शिंदे रात्री अचानक कोल्हापूर दौऱ्यावर आले होते. त्यांच्या दौऱ्याबाबत गुप्तता ठेवण्यात आली होती. राज्यात सध्या मराठा आरक्षणाचा प्रश्न गंभीर बनलाय. राज्यात विविध ठिकाणी मंत्र्यांना काळे झेंडे दाखवले जात आहेत. त्यामुळं मुख्यमंत्र्यांच्या कोल्हापूर दौऱ्याबाबत पोलिसांसह प्रशासनानं कमालीची गुप्तता पाळण्यात आली.
