आमदार चंद्रकांत जाधव स्मृती चषक टी-२० क्रिकेट स्पर्धा
कोल्हापूर : शांद फाऊंडेशन व परिवहन कल्चर स्पोर्टस् फाऊंडेशन यांच्यावतीने आयोजित आमदार चंद्रकांत जाधव स्मृती चषक टी-२० क्रिकेट स्पर्धेत आज शास्त्रीनगर क्रिकेट मैदानावर झालेल्या सामन्यात कै. आण्णा मोगणे क्लबने रमेश कदम क्रिकेट ॲकॅडमीचा पराभव केला. प्रथम फलंदाजी करताना रमेश कदम अकॅडमीने ९७ धावा केल्या. स्वप्निल कदमने २१ धावा केल्या तर मोगणीच्या स्मित पाटीलने दोन बळी घेतले. मोगणे संघाने १४.३ षटकातच विजय मिळवला.
मोगणेच्या शुभम मानेने ५५ धावांची नाबाद खेळी केली. त्याला सामनावीरचा पुरस्कार मिळाला. दुसरा सामना पोलाईट सांगली विरुद्ध फायटर्स कोल्हापूर या संघांमध्ये खेळला गेला. पोलाईट संघाने नाणेफेक जिंकून प्रथम फलंदाजी करताना १७१ धावा केल्या. यामध्ये गणेश कुकडेने ५५ धावा केल्या तर फायटर्सच्या अक्षय भिडेने एक बळी घेतला. उत्तरादाखल खेळताना फायटर्सचा सर्व संघ १२५ धावात बाद झाला. त्यामध्ये शिवम कानिटकरने ४९ धावा केल्या तर पोलाईटच्या सागर कोरेने दोन बळी घेतले. पोलाईट संघाने ४६ धावांनी विजय मिळवला. गणेश कुकडे सामनाविरचा मानकरी ठरला.
शिवाजी विद्यापीठ क्रिकेट मैदानावर पॅकर्स क्रिकेट क्लब विरुद्ध सागरमाळ स्पोर्ट्स यांच्यात सामना झाला. सागर माळ संघाने प्रथम फलंदाजी करताना वीस षटकात सात बाद १७४ धावा केल्या. उत्तरादाखल पॅकर्स क्लबने वीस षटकात सहा गडी बाद १६२ धावा केल्या. सागर माळसंघाने १२ धावांनी विजय मिळवला. २४ चेंडूत ५४ धावा करणारा कौस्तुभ कोमोळीकर सामनावीरचा मानकरी ठरला. दुसरा सामना भिडे स्पोर्ट्स विरुद्ध सातारा यांच्यात झाला. सातारा संघाने नाणेफेक जिंकून प्रथम फलंदाजी स्वीकारली. सातारा संघाने २० षटकात सात गडी बाद १२४ धावा केल्या तर भिडे स्पोर्ट्सने १४ षटकात तीन गडी बाद १२६ धावा केल्या आणि सहा षटके व सात गडी राखून विजय मिळवला. १८ धावा दोन बळी घेणारा संग्राम पाटील सामनावीराचा मानकरी ठरला.
