गारगोटी :- भुदरगड तालुक्याची गारगोटी येथे असणारी तहसील कार्यालयाची इमारत ही जिर्ण झाल्यामुळे अधिकारी व नागरीकांची गैरसोय होत होती. तसेच नागरिकांना एकाच छताखाली शासकीय सुविधा मिळाव्यात याकरिता गारगोटी येथे नवीन सुसज्ज तहसील कार्यालय बांधणे गरजेचे होते. याकरिता शासन स्तरावर केलेल्या पाठपुराव्यास यश आले असून तहसील कार्यालय बांधकामासाठी १४ कोटी ७० लाख रुपयांचा निधी मंजूर झाला असल्याची माहिती आमदार प्रकाश आबिटकर यांनी प्रसिध्दीपत्रकाव्दारे दिली आहे.
प्रसिध्दीपत्रकात म्हटले आहे की, भुदरगड तालुक्यातील महसुली कामकाज गेले एक तप संस्थानकालीन इमारतीमध्ये सुरू होते. याठिकाणी अद्ययावत इमारती नसल्याने शासनाचा प्रमुख व अविभाज्य घटक मानल्या जाणाऱ्या महसूल विभागाचा कारभार जुन्या इमारतीमध्ये अपुऱ्या जागेमध्ये सुरू होता. तसेच येथे तहसील कार्यालय व इतर सर्व विभाग एकत्रितपणे जुन्या इमारतीतच कार्यरत होते. सदरची इमारत ही जिर्ण झाल्यामुळे अधिकारी व नागरीकांची गैरसोय होत होती. यामुळे सदर ठिकाणी नवीन व सुसज्ज इमारत बांधणे गरजेचे होते. याकरीता करण्यात असलेल्या पाठपुराव्यास यश आले असून अर्थसंकल्पीय अधिवेशनामध्ये या नवीन इमारत बांधकामासाठी 14 कोटी 70 लाख रुपयांचा निधी मंजूर झालेला आहे. याकामी राज्याचे मुख्यमंत्री एकनाथजी शिंदे, उपमुख्यमंत्री देवेंद्र फडणवीस व महसूल मंत्री राधाकृष्ण विखे-पाटील यांचे सहकार्य लाभले असल्याचे आमदार प्रकाश आबिटकर यांनी म्हटले आहे.
