हातकंणगले (प्रतिनिधी) : कोल्हापूर ते सांगली महामार्गावरील चोकाक (ता. हातकंणगले) येथे स्वाभिमानी शेतकरी संघटनेच्या वतीने आज (शुक्रवारी) आंदोलन करण्यात आले.
शिरोली फाटा ते अंकली फाट्यापर्यंत रस्त्याची चाळण झाली आहे. या निकृष्ठ कामाच्या निषेधार्थ स्वाभिमानी शेतकरी संघटनेने ठेकेदार व राष्ट्रीय महामार्गाचे प्रकल्प संचालक यांचा पुतळा जाळून निषेध केला.
स्वाभिमानी शेतकरी संघटनेकडून काल राष्ट्रीय महामार्ग प्रकल्प संचालक पंढरकर यांनी मी जनतेला उत्तर देण्यास बांधिल नाही, आपण लेखी तक्रार करा मगच मी कारवाई करतो असे उध्दट बोलल्याबद्दल उजळाईवाडी येथील कार्यालयात अधिकाऱ्यांशी वाद झाला होता. त्यामुळे स्वाभिमानीकडून रास्ता रोको व पुतळा दहन आंदोलनाची घोषणा केल्यानंतर एका रात्रीत या महामार्गावरील रूकडी, अतिग्रे, चोकाक , हेर्ले या भागातील खड्डे मुजविण्यासाठी यंत्रणा गतिमान झाली.
गेल्या चार महिन्यापासून ठेकेदार व अधिकाऱ्यांच्या अक्षम्य दुर्लक्षामुळे रस्त्याची चाळण झाली आहे. अनेक अपघात होवून यामध्ये अनेक प्रवाशी जखमी व मृत झाले आहेत. त्यामुळे प्रवाशी व वाहतूकदार या मार्गावर वाहतूक करत असताना जीव मुठीत धरून प्रवास करावा लागत आहे. स्वाभिमानीकडून गुरूवारपर्यंत रस्ता दुरूस्त न झाल्यास हातकंणगले येथे दिवसभर सांगली कोल्हापूर महामार्ग चक्काजाम करण्याचा इशारा देण्यात आला आहे. यावेळी महामार्गाच्या अधिकाऱ्यांनी सदर रस्ता मुदतीत पुर्ण करण्याचे व संबंधित ठेकेदारावर कारवाई करण्याचे आश्वासन दिले.
यावेळी जिल्हाध्यक्ष वैभव कांबळे, संदीप कारंडे, संतोष जाधव, राजेश पाटील, सागर मादनाईक, ॲड. सुधीर पाटील, ॲड. सुरेश पाटील, सुजित जाधव, मुनीर जमादार, संपत पवार, अण्णा मगदूम यांचेसह परिसरातील ग्रामस्थ उपस्थित होते.
