कागल प्रतिनिधी : येथे रविवार (दि.१८ सप्टेंबर ) रोजी एक लाख रुपये बक्षिसांची यावर्षीची पश्चिम महाराष्ट्रातील भव्य झिम्मा-फुगडी स्पर्धा होणार आहे. याचबरोबर उखाणे, जात्यावरील ओव्या, पारंपारिक वेशभूषा याही स्पर्धा होणार आहेत. राजमाता जिजाऊ महिला समिती व राजे विक्रमसिंह घाटगे फौंडेशन यांच्यावतीने या स्पर्धेचे आयोजन केले आहे अशी माहिती राजमाता जिजाऊ महिला समितीच्या कार्याध्यक्षा नवोदिता घाटगे यांनी आयोजित पत्रकार परिषदेत दिली.
पुढे बोलता घाटगे म्हणाल्या की, महिलांच्या कलागुणांना वाव मिळावा,पारंपारिक खेळ व गौरी गीतांचा ठेवा जतन करण्याच्या उद्देशाने या स्पर्धेचे आयोजन करण्यात आले आहे. कोरोना संसर्ग परिस्थितीमुळे गेली दोन वर्ष सर्वच सण-उत्सव उत्सवांवर निर्बंध होते. निर्बंध उठवल्यानंतर या स्पर्धेचे आयोजन केले आहे.स्पर्धेत प्रथम क्रमांकासाठी २१ हजार रुपये, द्वितीय क्रमांकासाठी १५ हजार रुपये, तृतीय क्रमांकासाठी १० हजार रुपये, चतुर्थ क्रमांकासाठी ७ हजार रुपये, पाचव्या क्रमांकासाठी ५ हजार रुपये रोख रक्कम व सन्मान चिन्ह या प्रमाणे बक्षिस देण्यात येणार आहे. तसेच वैयक्तिक ५०० रुपये ते १००० रुपये पर्यंतची आकर्षक बक्षीसेही देण्यात येणार आहेत. याशिवाय ही स्पर्धा पाहण्यासाठी उपस्थित असणाऱ्या पाच महिलांना ड्रॉ पद्धतीने पैठणी जिंकण्याची संधी मिळणार आहे. स्पर्धेत प्रवेश विनामूल्य आहे.शाहू हॉल कागल येथे दुपारी एक ते रात्री नऊ या वेळेत या स्पर्धा होतील. या स्पर्धा कागल, मुरगूड, गडहिंग्लज शहर, कागल ग्रामीण व उत्तूर विभागातील स्पर्धकांसाठी घेण्यात आली आहे. अशी माहितीही यावेळी सौ.घाटगे यांनी दिली.
महिला बचत गट व महिलांनी तयार केलेल्या वस्तू विक्रीसाठी राजमाता जिजाऊ महिला समितीने नेहमीच व्यासपिठ उपल्बध करुन दिले आहे.या स्पर्धास्थळीही वेगवेगळ्या वस्तू व पदार्थ विक्रीसाठी स्टॉल्स लावण्यात येणार आहेत.त्यामुळे महिलांनी तयार केलेल्या वस्तूंच्या विक्रीस प्रोत्साहन मिळणार आहे.असे सौ.घाटगे यांनी यावेळी सांगितले. यावेळी नगरसेविका विजया निंबाळकर,नम्रता कुलकर्णी,सुधा कदम व अरुण गुरव आदी उपस्थित होते.
