कोल्हापूर (प्रतिनिधी) : मांडरे (ता.करवीर) येथे एका गटाने गोळीबार करून दहशत माजवली. याप्रकरणी मुख्य संशयित अभिजीत सुरेश पाटील यांच्यासह ११ जणांविरुद्ध करवीर पोलीस ठाण्यात आज (शनिवारी) गुन्हा दाखल झाला आहे. गणेशोत्सव मंडळाच्या महाप्रसाद कार्यक्रमावेळी भावकीतील दोन गटात वाद उफाळून आला. यावेळी काठी आणि दगडाने केलेल्या हल्ल्यात चौघेजण जखमी झाले आहेत. शुक्रवारी रात्री उशिरा ही घटना घडली.
गुन्हा दाखल झालेल्यात मुख्य संशयित अभिजीत सुरेश पाटील, समीर कृष्णात पाटील, सुरेश रामचंद्र पाटील, बाजीराव पांडुरंग पाटील, विशाल बाजीराव पाटील, विकास बाजीराव पाटील, दादासाहेब श्रीपती पाटील, प्रकाश शंकर भावके, स्वरूप सुरेश पाटील, राहुल कृष्णा पाटील, तुषार राजाराम पाटील (राहणार सर्व मांदर तालुका करवीर) यांचा समावेश आहे.
यापैकी दहा जणांना आज पहाटे करवीर पोलिसांनी अटक केली असून त्यांना न्यायालयाने चार दिवसाची पोलीस कोठडी सुनावली आहे. फिर्यादी उदय सोनबा पाटील (व 39 राहणार मादर) यांच्यासह चौघेजण जखमी झाले आहेत. दोन गटातील संघर्षामुळे परिसरात तणावाची स्थिती निर्माण झाली आहे. पोलीस निरीक्षक अजय कुमार शिंदकर, पोलीस निरीक्षक सुरज बनसोडे यांच्यासह पोलिसांचा फौजफाटा गावात दाखल झाला आहे.
पोलीसांकडून मिळालेली अधिक माहिती अशी की, गणेश उत्सवानिमित्त गावातील हनुमान तरुण मित्र मंडळाने शुक्रवारी रात्री गावात महाप्रसादाचे आयोजन केले होते.महाप्रसादाची पहिली पंगत पंगत सुरू करण्यापूर्वी अध्यक्षांनी फेटा बांधून पंक्तीसमोर पाणी घालण्याची प्रथा आहे. मात्र, त्याला फाटा देऊन दुसऱ्यानेच पाणी घातल्याने गावातील एका गटाने हरकत घेतली. या कारणातून वादावादी आणि एकमेकांच्या अंगावर धावून जाण्याचे प्रकार घडले. गावातील प्रमुखांनी हा वाद सामोपचाराने मिटवण्याचा प्रयत्न केला. मात्र, त्याला यश आले नाही. दोन्ही गट समोरासमोर आल्याने हाणामारी सुरु झाली.
यावेळी अभिजीत सुरेश पाटील यांनी बंदुकीचा परवाना नसतानाही फिर्यादी उदय पाटील यांच्या दिशेने १२ बोर बंदुकीतून गोळी झाडली. यावेळी उदय पाटील बाजूला झाल्याने सुदैवाने ते बचावले. या घटनेनंतर एका गटाने काठ्या व दगडाने हल्ला करून चौघांना जखमी केले. नागरिकांनी तात्काळ करवीर पोलीस ठाण्याशी संपर्क साधून माहिती देताच पोलीस पथक घटनास्थळी दाखल झाले. खबरदारीचा उपाय म्हणून गावात पोलिसांचा बंदोबस्त वाढवण्यात आला आहे. ऐन गणेशोत्सवामध्ये गोळीबार आणि हाणामारीची घटना घडल्याने परिसरात खळबळ उडाली आहे.
