नवी दिल्ली : लोकसभेतील शिंदे गटाच्या १२ खासदारांनी राहुल शेवाळे यांना आपले गटनेते आणि भावना गवळी यांना आपल्या प्रतोद म्हणून नियुक्त करण्याची विनंती लोकसभा अध्यक्षांकडे केली होती. त्यानंतर या नियुक्तीला मान्यताही मिळाली होती. मात्र आता शिवसेनेचे खासदार विनायक राऊत यांनी राहुल शेवाळे यांच्या गटनेतेपदी झालेल्या नियुक्तीवर आक्षेप घेतला आहे.
याबाबत विनायक राऊत म्हणाले , शिवसेनेच्या बंडखोर गटाने १९ जुलैला राहुल शेवाळेंच्या गटनेतेपदाबाबत मागणी केली होती. मात्र लोकसभा अध्यक्षांनी १८ जुलैलाच हा निर्णय घेतला. त्यामुळे बंडखोरांना निवडण्याचा निर्णय आधीच झाला होता. तसेच लोकसभा अध्यक्षांनी आमच्या पत्राची दखल न घेता, नैसर्गिक न्यायाचे तत्व न पाळता निर्णय घेतला. आम्ही ६ जुलैलाच लोकसभा अध्यक्ष आणि संसदीय कामकाज मंत्र्यांना पत्र दिले होते. त्यानंतर १८ जुलैला रात्री साडेआठ वाजता लोकसभा अध्यक्षांच्या घरी जाऊन शिवसेनेच्या गटनेतेपदावर कुणी दावा केल्यास आम्हाला आमचे म्हणणे मांडण्याची संधी द्या, अशी मागणी केली. पुन्हा १९ जुलैला समक्ष भेटून लोकसभा अध्यक्षांना त्याबाबत पत्र दिले. मात्र, त्यांनी आमच्या पत्रांची दखल न घेता अचानक लोकसभेतील शिवसेना गटनेते बदलले आहेत. राहुल शेवाळे यांचे नाव लोकसभा संकेतस्थळावर दाखवले जात असल्याचे त्यांनी म्हटले आहे. लोकसभा सचिवालयाचे हे कृत्य कोणत्या नियमाला धरून आहे याचे आम्हाला आकलन झालेले नाही. त्यांना कोणताही नैसर्गिक न्याय नसून आमच्या पत्राची दखल न घेता बंडखोर गटाचा गटनेता त्यांना बनवायचा होता असा आरोप शिवसेना नेते विनायक राऊत यांनी केला आहे. तसेच याप्रकरणी लोकसभा अध्यक्षांना जाब विचारणार असून सर्वोच्च न्यायालयातही दाद मागणार असल्याचे त्यांनी सांगितले.
