कोल्हापूर : एसटी कामगारांचे वकील गुणरत्न सदावर्ते यांच्या अडचणी वाढतच आहेत. कोल्हापूरचे जिल्हा व सत्र न्यायाधीश व्ही. पी. गायकवाड यांनी त्यांना सोमवारपर्यंत पोलीस कोठडी सुनावली.
मराठा क्रांती मोर्चाचे समन्वयक दिलीप पाटील यांनी गुणरत्न सदावर्ते यांच्या विरोधात शाहूपुरी पोलीस ठाण्यात गुन्हा दाखल केला आहे. सदावर्ते यांनी मराठा आरक्षणाला विरोध करून मुंबई उच्च न्यायालय आणि सर्वोच्च न्यायालयात याचिका दाखल केली आहे. तसेच मराठा आणि मागासवर्गीय समाजात तेढ निर्माण करण्याचा प्रयत्न सदावर्तेंनी केल्याची तक्रार दिलीप पाटील यांनी केली आहे. सदावर्ते यांना ताब्यात घेण्यासाठी कोल्हापूर पोलिसांचे पथक काल मुंबईत दाखल झाले होते. मुंबई न्यायालयाने त्यांना पुन्हा १४ दिवसांची न्यायालयीन कोठडीचा आदेश दिल्यानंतर सदावर्तेंचा ताबा कोल्हापूर पोलिसांकडे दिला. पोलिसांनी सदावर्ते यांचा बुधवारी सायंकाळी आर्थर रोड जेलमधून ताबा घेतला होता. काल मध्यरात्री हे पथक कोल्हापुरात दाखल झाले. अ‍ॅड. सदावर्ते यांची वैद्यकीय तपासणी करण्यात आली आहे. त्यानंतर त्यांना आज सकाळी जिल्हा व सत्र न्यायालयात हजर करण्यात आले.
सरकारी वकील आम्रपाली कस्तुरे व फिर्यादी दिलीप पाटील यांचे वकील ॲड. शिवाजीराव राणे यांनी युक्तिवाद केला तर सदावर्ते यांच्या बाजूने ॲड. पीटर बारदेस्कर यांनी युक्तिवाद केला. दोन्ही बाजूचा युक्तिवाद ऐकल्यानंतर जिल्हा व सत्र न्यायाधीश व्ही. पी. गायकवाड यांनी सदावर्तेना सोमवारपर्यंत पोलिस कोठडी सुनावली.
